电子邮件关注

2011年6月17日星期五

壹週刊 - 1110 - 豪語錄 寶山回 洪朝豐

 

豪語錄

寶山回 洪朝豐

2011年06月16日

告別一段日子的洪朝豐,最令人難以忘懷,是他以一把磁性的聲線主持《日月星辰》的電台節目,之後患上抑鬱狂躁,還有他在九八年因訪問劉鑾雄前妻寶詠琴而和她萌生情愫,當眾吻八次,之後又離又合,愛恨交纏總計相處相愛過兩年。
今日拍攝選址在鯉魚門石礦場,因為鯉魚門是他長大的地方。
「由三歲住到三十六歲,三十三年了,因為清拆所以搬。」
住藍田公屋的他,之後因認識寶詠琴已進駐她的馬己仙峽道豪宅,兼有司機管接管送,如入寶山。
回頭看,他卻如入寶山空手回,今日的洪朝豐依然和兒子住在九九年用廿多萬買下的藍田公屋,採訪時亦是坐我們的採訪車。曾入寶山的他不帶走不留低任何東西,起碼康復後已不爆寶詠琴的事,感覺比搭上龔如心的陳振聰來得清高脫俗,難怪寶詠琴前夫劉鑾雄也讚過他真。
站在礦山上、在三十三點四度高溫下,背着爛礦山,面向高樓大廈的洪朝豐,他嘆口氣說:「你在塵世之中,但也不可不吃人間煙火。」
他說的是八月中會為鄭經翰的數碼電台復出開咪。

簡約生活

放大圖片

八三年,洪朝豐和葉桂好在他的油塘徙置區家敬茶。

八三年,洪朝豐和葉桂好在他的油塘徙置區家敬茶。

約洪朝豐做訪問,他堅持不向贊助商借衣服,不用替他找化妝髮型師。他禮貌說:「唔好意思,我係呢方面幾唔合作。我八二年畢業,八三年加入電台,我打滾咗幾十年,我哋心境好簡單,唔使花臣,係着重內在淡然的交流,唔係佢著件 sponsor衫著得好有氣質喎。」他八九年開始做過電視主持、演過電視電影、舞台劇京劇等,故攝影時輕易交出表情。
潮流興復出,最近因蔡楓華復出開演唱會,洪朝豐再一次被提到跟蔡楓華、陳寶蓮、藍潔瑛被封為「四大癲王」。這些年來,洪朝豐去了哪裡?
「○四年我孤身去過洛杉磯華語電台做 DJ,做兩年返番嚟喺屋企幫佢做,最大唔適應係始終有種異鄉感覺,你覺得儘管有好多中國人朋友,儘管有時間去飲茶食碗牛腩麵,但始終唔係真實嘅世界,要食牛腩麵係記掛住香港嘅牛腩麵。」

放大圖片

九八年,他與年長六年的寶詠琴拍拖。(《忽然 1周》圖片)

九八年,他與年長六年的寶詠琴拍拖。(《忽然 1周》圖片)

他為鄭大班的中文音樂台工作,和顏聯武一起坐鎮,預計八月中開工,在中大主修新聞及傳播系,副修音樂的他,是男高音,現階段教唱歌說話技巧,以前收費五百元一堂。
「學唱歌學講嘢的學生都有,教佢哋營造一把磁性嘅聲音,我唔係個個收,講緣分。」
洪朝豐閒來會去健身中心做運動,兼有教練指導,集中強化大腿肌肉,解決膝頭蓋痛症。
「有時容易感冒,個人容易攰。譬如我膝頭哥痛影響我行山,但原來唔關膝蓋事,係我大腿肌肉唔夠力,變咗上身重量聚晒落膝頭哥,於是膝頭哥勞損,依家收腹挺胸伸直頸最重要。」

家族多病

放大圖片

洪朝豐今年五十一歲,家族一直多病痛,表妹羊癇,父親患鼻咽癌,死於肺癌。家姐洪秀娟有心臟病,試過心臟停頓三分鐘,死過翻生。母親今年九十二歲,九五年開始有老人痴呆,食飯時給院方綁住怕她打人。
「媽媽依家唔認得我,眼神避開我,係傷感的。」
洪朝豐在泰國的堂兄抑躁症病發,終年四十,洪的兄長亦終年六十,兄長在四十歲時已生活得不如意。
「佢抑鬱飲酒飲到癲,瞓喺屋邨二樓平台趴喺度,人哋以為佢死咗。佢最後飲醉酒,喺地鐵站行行吓碌咗落地,後腦着地,腦積水,一個星期死咗。」
洪朝豐亦受家族遺傳,患抑鬱狂躁症。
「一個家庭你分到呢樣嘢也無符,精神病可以無原因觸發,同壓力無關。」

一無所有

放大圖片

他病發時,爆寶詠琴性事及向她追討一百萬,其後他瘋狂消費,廿萬買珍珠、五十萬買翡翠,帶記者去 Vivienne Tam、 Esprit及連卡佛購物,兩日花上廿六萬,又花八萬請記者食魚翅,○○年開設古董店「霎東門」,最後蝕本執笠。
「蝕咗唔止三百萬,無晒身家。有段時間有線俾機會我喺電視上訴心聲,節目叫做《一個機會》,又做咗一段時間 documentary配音,有樣嘢好多謝前妻,我幫佢打咗一年工(於前妻葉桂好的洪葉書店工作)。」

難逃一劫

放大圖片

你係電台高層,你夠唔夠膽俾個癲佬主持節目?所以兜番嚟講,睇嚟鄭經翰都係癲。

你係電台高層,你夠唔夠膽俾個癲佬主持節目?所以兜番嚟講,睇嚟鄭經翰都係癲。

洪朝豐當時是十大最受歡迎主持之一,排名第五,僅次於車淑梅、鄭經翰、梁繼璋及黃偉文,有二百萬年薪,月薪十多萬,因病弄得人見人怕,回頭看,他深信仍難逃一劫。
「夜闌人靜時想起難免可惜,但再諗都無用,你認命囉,之前係抑鬱,緊接係狂躁,因為真係有病,有錢會 fing錢,有名都會整衰晒,無得好講。我有問個天,係唔係想我經歷這些,等我以後幫到更多人,但當時我講:『我唔想囉!』」
朋友驚了他疏遠他,現在知心友是以前節目助理,主持好友有余文詩,鄧梓峰及陳啟泰。
「我哋會飲茶,食飯,去屋企坐。我節目助理早上個星期,同個女做咗愛心糉送嚟我屋企,過年又話佢媽咪做咗蘿蔔糕,攞嚟俾我,舊年敖嘉年咪好紅,佢係我以前拍檔,舊年打電話請我食飯,知佢發展得好都替佢高興。其實我以往嘅病,係好好嘅篩漏,有啲親人朋友因為同我關係好而俾人歧視,俾人話佢癲,唔伯俾人話癲的朋友,才是好朋友。」

放大圖片

現在他已康復,但要一世食藥,家姐朋友關懷是最大動力,他亦感恩天生有一種自我調節能力。
「有啲細路跌低後死也不起身,有啲跌低喺度喊,目的叫人扶佢起身,我屬於撻低咗,我本能好自然爬番起身,我天生屬於這種 baby,跌低咗咪起身。醫生話運動好,你幾辛苦都逼自己去,個心抑鬱時,鎖住肌肉筋骨,可以去按摩,提自己天無絕人之路,只有自己絕自己的路。」
當年洪朝豐真是跌進谷底,經濟上除了公屋一無所有,名譽掃地,感覺茫然。
「你搵唔到出路,又唔知個天想你點,人哋覺得你癲,會唔會俾嘢你做先,你係電台高層,你夠唔夠膽俾個癲佬主持節目?所以兜番嚟講,睇嚟鄭經翰都係癲。依家有自己嘅工作,正好向睇衰我、覺得我一世完蛋嘅人打一巴。」

重新出發

放大圖片

○六年洪朝豐再病發,兼去泰國剃頭剃眉做七日和尚,為母親祈福。(《蘋果日報》圖片)

○六年洪朝豐再病發,兼去泰國剃頭剃眉做七日和尚,為母親祈福。(《蘋果日報》圖片)

洪朝豐復出的節目仍然係訴心聲,一星期三晚,每次三小時,還會自己揀歌。
「佢哋覺得我揀嘅音樂有 taste,我畢竟離開香港嘅電台媒體十二年,我需要時間 pick up香港、台灣、大陸,甚至外間的流行音樂,我以前返到 office係揀歌,我預咗要花好多時間聽歌,我好奄尖,可以聽十張碟都搵唔到一首歌。我十二年無响香港做 DJ,啲人有時都走埋嚟同我講好鍾意聽我節目,話我播嘅歌好好聽。」
有報導指大班以千五萬三年高薪利誘梁思浩加盟數碼電台,唔知洪朝豐有沒有參考這價錢向大班出價?
「成個薪金,假期,工作範疇大班心裡有個數,佢開出嘅條件好有誠意,佢唔會因為你發生咁多事壓你價。佢唔係睇死你一定要做,佢唔係這種人。」

放大圖片

他與患老人痴呆症的母親合照。

他與患老人痴呆症的母親合照。

洪朝豐說他○四去洛杉磯做電台節目時,節目依然是很受歡迎,導致○九年回去開演唱會也全院滿座,一票難求。
「你見到我嘅節目幾受歡迎。」
他當年的對手有陳海琪、顏聯武、雷宇揚,然而今日大家流行聽余迪偉、鄒凱光、阿 Bob,再重新出發受歡迎程度能否及得上當年?
「無諗到咁遠,努力做,要學習順其自然才唔會患得患失。」
再復出,有無想過人家點看你?
「四十歲仲會喺呢方面比較多考慮,但我也做了半世紀人,仲要睇你。」
他兄長死當天,剛好是寶詠琴死那天。寶詠琴於○三年四月因換腎後併發症逝世,每逢四月,心情會否特別沉重,有否覺得對不起她?
「關於她的我唔想多講,畢竟過咗十幾年,人生要再重新出發,唔可以講番誰是誰非,既然過咗去,無必要再講,她人也不在。」

迂迴曲折

放大圖片

訪問三小時,從未察覺佢怪行、仲好識保護自己,關於寶詠琴的事,洪朝豐選擇性不回應,兒子洪葉今年廿七歲,叫洪葉是取洪朝豐和葉桂好的姓氏,洪葉在理大畢業後做 IT。和兒子的故事他亦只輕輕帶過,「我哋關係好好,由細到大都好好,知己朋友同父親關係。」然後又煞有介事說:「仔嗰啲唔講,佢有佢獨立生活,我唔想介入他的生活。」
你自己的性取向?「感情事唔講,再婚唔講,性取向也不回應,呢啲係我私人生活,唔想同唔相干嘅人有任何關係。」
他的人生路迂迴曲折,「係比較戲劇性及跌宕。」前路會是怎樣?他老闆大班亦力撐他可再創高峰,「佢有經驗,聲又好聽,佢完全勝任,佢一定有聽眾,應該俾機會佢。」祝君好運!

撰文:李苑欣
攝影:胡春輝

壹週刊 - 1110 - 豪語錄 寶山回 洪朝豐

没有评论:

发表评论