史上最厲害的士司機 - 畢明
深夜，乘的士，會遇上一些你永世難忘的事，那些記憶，墮胎都打唔甩，咁就一世。你是幾時知道「地溝油」這鬼東西的？從何得知？很多人是這兩年，從報紙。我卻是六、七年前了，在的士，那夜那程車，陰魂不散，清楚記得。而我不是和你講都市聊齋。
至少六年前了，我還未轉工，還在廣告公司販賣青春和腦汁，那夜，回家梳洗一下，十一時許又出門，要通宵拍攝電視廣告。清楚記得，是八達通crossover麥當勞的廣告，當時推出後來鬧得滿城風雨的「日日賞」。通宵的"graveyard shift"我都不駕車，雖然從來通頂不睏的我不會「睡駕」，但還是安全點好。周日，那時份，的士不少，揚手，就有。「鰂魚涌近太古坊那間麥當勞吖唔該」，「好呀」。
頭一分鐘，相安無事，寧靜，無聲。很好。我怕那些嘴巴失禁的口水佬，有些更是「男版蔣麗芸」，絕對《見鬼10》，跳車都唔掂。腦中正盤算也預演着一會兒的拍攝事宜，的士大佬開口了：「小姐，咁夜仲要返工呀？香港人真係辛苦！」為了扮勁加上我包拗頸不想直認，「你又知？」「咁夜，去嗰頭，又冇嘢玩又冇嘢食，仲唔係做嘢？」你贏。
然後戲肉來了。「做香港人真係辛苦，日做夜做，我成日車啲人夜媽媽仲要返工㗎，唔係日頭唔使做返夜班喎，係啱啱放工又再返喎！」是夜我口崩，無語。「好嘞，辛苦過辛亥革命，先買到層樓，豆膶咁細，花幾多錢裝修到靚一靚，邊個享（受）呀，你菲傭；買套哇~靚Hi-Fi，邊個聽呀，你菲傭！你有時間喺屋企咩？！仲有呀，生個Ｂ，好得意好可愛，邊個玩邊個enjoy呀，都係你菲傭！」我額角有滴汗，對眼變了三劃。「好喇，平日死做爛做，weekend到你放假，假期想enjoy吓間屋、聽吓Hi-Fi，玩吓BB，菲傭就放假！家務你自己做啦，仔你自己湊、自己換屎片啦，仲要個Ｂ唔鍾意跟你喎！」
「一層樓害死全香港！個個俾磚頭綁死，邊仲有大志呀！香港咁細，邊出得咁多世界富豪呀，個個千億身家，美金喎，實業呀？炒地炒樓囉，人人買唔到樓，佢哋幾家人擸晒全香港啲錢，使乜官商勾結呀，商商勾結你都死啦！得佢哋賺晒，唔似七、八十年代，人人都有機會出頭，依家機會好唔平均好窄，打份牛工囉，咁唔公平，實死㗎……」我開始懷疑佢係……黃秋生？！羅拔迪尼路？「Are you talking to me？」
「以前仲話辛苦搵嚟自在食，我食都怕！我揸過貨櫃跑過大陸，見好多，唔知喺啲乜爛地榨啲乜污糟油，無良㗎，一車車咁車俾人食，嘿！香港啲茶餐廳呀酒樓呀，幾多用呢啲油你知唔知呀，慳好多呀，煮乜都用油，你食咗幾多污糟嘢呀美食天堂…」
「我冇樓冇菲傭，放假我返鄉下，好樸素唔繁榮㗎，間屋又大空氣又好，食自己種嘅菜，甜嘅！炒幾片豬肉，條村自己養嘅（豬），香到！冇人鎖門㗎，坐喺屋前面，吹吓風，聽吓樹葉傾偈……」
到了，被徹底KO的香港人說聲「唔該」，下車。之後我再沒有碰上這位的士司機。我想，那夜，我比誰都先遇上了一代宗師。
发自我的 iPad
没有评论:
发表评论