�果日�- 餐��人 - 左丁山

餐廳搶人 - 左丁山

上星期蘋果副刊（五月七日）訪問金鐘太古廣場的意大利餐廳domani老闆JR，記者寫得很不錯，但當然有改善空間。張大姐閱報後，要請董社長夫婦、公關大姐大與左丁山到domani吃一頓午餐。可惜吖，時間撞到正，左丁山要主持校友會午餐例會，已邀請咗一位具備廿年暑假遊學團經驗嘅專家演講，教吓提醒校友如何為子女選擇遊學團及須注意事項，無緣消受張大姐呢一餐咯。

JR因domani結業，心情自然欠佳，不過睇到佢啲手下好快搵到工，無失業之虞，心情好番啲，都話過嘅啦，今天香港事求人，搵工好易，domani一聲話結業啫，其他餐廳就聞風而至搶人；又有咁啱嘅，五月九日南華早報有超級封面廣告，就係Jamie's Italian（暑假在時代廣場開張）招聘人手，呢間意大利餐廳由聞名全球嘅星級大廚Jamie Oliver開辦，未開先轟動，時間又咁巧合，直情可以掹成隊domani人員過檔。不過「泰晤士報」好似有意贈興，在五月九日嘅飲食新聞刊登一篇報導Jamie's dirty little secrets exposed，指倫敦市衞生幫辦在今年一月查到Barbecoa（在聖保羅大教堂後面）呢間貴價餐廳（差不多一百英鎊一餐），衞生情況不如理想，樓下間豬牛肉庫內裏不乾淨，貴價和牛肉、牛尾等等已過了「可用期」，衞生幫辦評分係一分（最高五分）……睇完泰晤士報段報導，先知道聞名全球嘅餐廳集團在衞生管理方面，問題嚴重。

JR雖因domani而心情低落，但兒子John就有新婚之喜，令JR夫婦非常高興，JR來港40年，兒子在香港成長，到英國讀大學，根本唔想返美國做美國人，新娘在Economist集團服務，母親係台灣人，上星期六在中區聖約翰大教堂舉行結婚典禮，晚上在怡和大廈地庫嘅Grappa's宴請來自世界各地嘅親戚朋友，怡和大廈Grappa's地方夠大，售中價意大利菜，平時生意不俗，呢晚外籍賓客眾多，勝在各款洋酒任飲唔嬲，真正係on the house，左丁山早知有此情況，自馬場趕出嚟，唔揸車咯，特登坐的士去，以免酒後駕駛，至於意大利餐，用來送酒而已。John在香港大，話明懇辭禮物，因為居所淺窄，擺唔落喎，但預備咗大量利是封俾賓客使用，大家識做啦！此晚有十幾人（好似係16人）組成嘅爵士樂隊演奏演唱，阿Sam十幾歲時已在樂壇出人頭地嘅Anders Nelsson（聶安達）客串唱幾首歌，其中一首竟然係「月亮代表我的心」，歌詞英文、廣東話、普通話夾雜，唱得真過癮。

发自我的 iPad