踩住單輪揀凶宅 伍冠流
六十三歲的伍冠流，是物業拍賣場上有名的「凶宅大王」。
低價入、高價出，買得凶宅，當然唔信「邪」。
叫他單獨瞓凶宅，「無難度，有鬼最好俾我見吓！」
又因唔信邪，他搏老命學人玩單輪單車。
雙手伸展、雙腳踏實，如今踏上單輪，就如換上跑鞋般輕快。
踩住單輪搵凶宅，仲唔快人一步？
自學踩單輪的伍冠流，在 YouTube上發現外國有短片，教人推超市購物車，又或扶實跑步機兩邊學踩單輪。他說：「其實踩跑步機唔易，好難搵到個平衡點，而且每部機嘅速度都唔一樣。」
二十年來，伍冠流買賣過幾十間凶宅，拍賣場上他眼神銳利，如獵鷹般找尋獵物。場外亦好唔得閒，日日在跑步機上操 fit。不過他是在跑步機上踩單輪單車。學單輪，伍冠流靠自己，最初只是扶着天橋底的欄杆邊跌邊行，近日已能暢順地踩着單輪到沙田第一城，收回剛租約滿的凶宅單位。
天橋底啲柱，每隔兩步就有一條，逐條柱捱過去唔會好難。試咗六個月就學識平衡，上 YouTube睇吓，原來可以喺跑步機上練，咁我又試吓。不過只有落雨天，或者天氣太熱、太差，我先留喺屋企「踩」跑步機。因為我覺得落街踩開心好多，一踩就兩、三個鐘，好似變咗一條魚、一隻雀仔咁，輕鬆自在！
呢部單輪，係廿年前一個生意拍檔送俾我個仔嘅。去年個仔唔要，話要掉去垃圾站，我話：「唔好啦，食得唔好嘥。」自己試吓，雖然年紀大，但我唔信邪，自己戴住頭盔練、練、練。而家好少地方踩唔到，只係上月喺街跌親，菠蘿蓋撞咗落石仔度。好在啲骨只係裂咗，唔係碎咗，休息三個星期又踩得。我仲買咗個保護性強嘅硬身護膝，不過唔自在，我都唔係成日用。
我唔信邪，亦唔信有鬼。我好大膽㗎，有鬼最好俾我見吓！等我知道鬼係點㗎嘛。廿一年前我第一次接觸凶宅，就係自己住嘅北角新都城大廈。當時我準備移民，搵工人裝修單位再放盤，點知有日落雨，咁啱屋企地下有水，咁啱工人對水靴又入水，再咁啱漏電，結果……如果是但一樣唔發生，就唔會出事。嗰時難過之餘，諗住要大劈價放售。點知隔咗幾個月，件事丟淡咗，又唔使折讓好多喎，咁我就知道凶宅都有投資價值。伍冠流於華仁書院中五畢業，其後從事魚翅買賣生意，「業餘」投資凶宅。咪話唔邪，他買過的一間屯門凶宅，曾「凶過兩次」，試過有租客割脈加吊頸死，後來又有接貨業主燒炭身亡，但他認為單位夠光猛，照買如儀！伍冠流信基督教，不怕鬼。試過有準買家要他在火炭凶宅宿一宵，以證明單位無鬼。他帶個睡袋、幾本書，就在凶宅廳中「打地鋪」。
我揀凶宅，有偏好嘅。凶宅中，最好係跳樓，因為可以同下一手買家「拗」，話個人喺單位時仲在生㗎！之後係燒炭，死者冇乜知覺，唔會痛，不過地下就有機會有個炭爐印。
每間凶宅背後，都有一個悲慘故事。我買凶宅，單純只為投資。投資最緊要買入時折讓大、有水位。要賺錢一係忍，等到「等錢使」嘅業主出現，呢啲業主先最肯減價；一係就揀凶宅，我出價大約係市價嘅六折。但唔係所有凶宅我都願意買，好似「燒炭勝地」長洲東堤小築，我就嫌交通唔方便，○三年時幾萬至十幾萬任揀㗎。另外他殺都唔係咁好，因為死者唔係自願。平台凶宅單位都唔鍾意，一來低層易塞渠，二來人哋跳樓跌正落嚟，咁又變咗「多重凶宅」。
近年樓價飆升，連凶宅都大把人爭！折讓愈來愈少，唯有分散投資至更冷門的半契樓、無契樓等，貪業權更複雜，對手較少。依家我買半份契嘅樓，都要做足功課，有時會搵埋私家偵探，查吓點解會賣咗半份業權出去，而揸住業權嗰方又係咩人，我睇吓可唔可能買埋。要摸到底細，先知點樣出招。呢啲單位一樣睇到世情，試過有阿媽太嬲個仔，專登賣走半份契，一拍兩散，咁樣好可惜。
不喜歡與行家埋堆的伍冠流，平日外出踩單輪車亦懶理途人的目光，一出門即戴定頭盔眼望前方，「都被望到慣晒啦！」
全港「最凶」的荃灣中心六屍凶宅，三年前拍賣，只得伍冠流及另一凶宅大王陳應佳爭奪，最終陳應佳以近百二萬元買下收租。
（《蘋果日報》圖片）
三年前仍要戴近視鏡的伍冠流，買下烏溪沙老屋地打算自行發展，如今他的老花已「醫好」了近視，但地皮因程序問題仍舊沒半點進展。
（《蘋果日報》圖片）凶宅發生過嘅事，我無得改變、亦補救唔到。但眼前嘅香港政局，我卻會爭取改變！香港最好嘅地方，就係乜都可以試，所以一個有民主、有制度、以及公平嘅社會，係好重要。我支持市民有權提名嘅真普選，之前第一日有得網上公投，我已第一時間投咗。要佔中的話，我一定會去！就算佔中會影響樓價，我都支持。樓價跌只係短期，長遠我想香港好。命運，從來都應該掌握喺自己手上！
由你開講
一切好人好事，壞人壞事，先吐為快。
你敢坦白，我敢講。
電郵： voice@nextmedia.com
没有评论:
发表评论