女兒情海翻波 689自作自受
特首梁振英次女梁齊昕早排喺 facebook上載手相，事件愈鬧愈大。 689為咗救火，向友好網站放出一家英倫合照「晒幸福」。點知梁齊昕接受《信報》網站訪問，承認不只一次自殘，更直指母親唐青儀要負最大責任。佢又踢爆，海德公園合照係「被操控」之下拍攝，批評父親採取蹩腳公關伎倆（ lame PR stunt）。照顧女兒不力， 689反而暗示傳媒騷擾佢一家，真係百分百梁式語言偽術。
現年廿二歲嘅梁齊昕，就讀倫敦政經學院（ The London School of Economics and Political Science），男友 Michael方係佢同學，二人兩年前喺梁振英當選特首期間「撻着」。不過，來自大學圈嘅人士話，二人拍拖後經常鬧分手，令女方情緒波動，「散完又一齊，一齊無耐又散，大分手、小分手成日都有。」
「劉進圖遇襲之後，佢喺 facebook留言掀起罵戰嗰排，男方就想飛甩女方，但無幾耐喺 facebook又見到佢哋有互動。你見佢割腕張相，其實有啲舊疤痕，相信都有部分同感情不穩有關囉！」
據知， Michael來自中產家庭，中學同大學都係活躍分子，甚有女性緣，亦成為兩人感情時好時壞嘅主要因素。 689有冇向男方施壓？大學圈消息人士話，男方知悉女友父親特殊身份，但佢絕少提及女方家人，同學們亦未聞佢同 689關係如何。
梁齊昕近年情緒出現問題，除咗家庭因素，同男友 Michael感情不穩定亦有關。
梁振英次女梁齊昕上星期三喺 facebook上載手照片。
「外國勢力」撐法律界遊行
參加黑衣遊行的法律界人士中，有不少外籍面孔，打破外籍律師未必關心香港政治的說法。（鄭樹清攝）
大陸成日話外國勢力干預香港政治，一千八百人上週五參加法律界黑衣靜默遊行，抗議《白皮書》損害司法獨立，就真係有好多外國力量支持，唔少外籍律師都走出嚟為香港發聲。
大律師 Martyn Richmond話七七年嚟香港，曾經喺警務處工作二十年，跟住轉行做大狀，執業都近十幾年。佢喺香港娶妻，落地生根，「全世界咁多地方，喺香港生活最耐，當然視香港為家。」○五年人大就特首任期釋法，佢都有參加遊行。
另一位外籍人士喺五星級酒店集團擔任法律顧問，佢話近期睇到律師會會長林新強撐《白皮書》嘅言論、黑客攻擊全民投票系統、大陸官媒話全民投票係非法等新聞，睇到火遮眼，要出嚟遊行。佢話：「 I love Hong Kong. I love China. But I hate the communist party.」（我愛香港，我愛中國，但我憎恨共產黨。）
「外國勢力」固然強大，本地律師都唔少，有一間小型律師行負責人話，總動員半個 office嘅職員嚟撐遊行。大嚿痛罵「共產黨狗奴才」
任憑大嚿點鬧，保皇黨始終都係做橡皮圖章，草草通過呢項甚具爭議嘅撥款議案。（王偉洪攝）
為咗反對新界東北發展前期工程撥款，泛民議員同建制派鬥個你死我活，鏡頭前後一樣不停鬧交。
上星期五財委會第三節會議，吳亮星企圖剪布，一眾泛民跑到台前抗議。佢眼見情況失控，宣布休會五分鐘。一直坐定定嘅民建聯黃定光，忽然企起身大叫一聲：「全部坐番埋位。」陳偉業（大嚿）隨即擰轉身大嗌：「共產黨最惡！」黃定光反擊：「爛仔黨！」怒髮衝冠嘅大嚿更加單挑眼前嘅全部建制派，大聲質問：「無共產黨喺度，你哋呢班友可以咁富貴？」
建制派不甘示弱，仲有人大叫：「閂咗機啦！」激到陳志全（慢必）都加入混戰，着建制派望向樓上三樓各大傳媒鏡頭。工聯會黃國健回話：「唔好再表演啦陳志全。」慢必同大嚿即上前質問黃國健：「表咩演呀？」「你哋係共產黨嘅狗奴才！」有建制派議員開口幫拖，亦有人選擇留喺位食花生，仲話：「呢條友（大嚿）真係唔使用咪㗎喎。」元秋獅吼功進擊泛民
鬧交當然唔少得蔣麗芸嗰份。第一節會議，李卓人批評吳亮星同建制派互相配合，意圖通過撥款，仲話吳亮星同梁美芬「眉來眼去」，激到鼠王芬扎扎跳。綽號「元秋」嘅蔣麗芸加入幫拖，泛民議員齊齊反擊。休會期間，元秋完全無打算休戰，同記者吹吹吓水，見到鼠王芬行過，又再笑住咁撩起火頭，向遠方嘅李卓人同埋郭家麒施展獅吼功，叫佢同鼠王芬道歉，仲大叫：「係男人就道歉啦！郭家麒！李卓人！」
斯斯文文嘅郭醫生一於少理，李卓人反而即刻還拖，向住元秋大叫，話有咩即管留番喺大會講。元秋繼續「霸氣」，再次咆哮：「啱啱講咗啦，你聽唔到呀？你撞聾啦！」馮檢基即刻㩒住阿人，元秋見對方停口，亦都休戰收口，會議室暫時回復平靜。
鼠王芬同元秋不約而同穿上紅噹蕩戰衣，向李卓人同郭家麒挑機，元秋向住佢哋大叫：「係男人就道歉！」（林璐菁攝）
成班泛民聽到元秋施展獅吼功，一臉苦笑，僅得李卓人忍唔住回應。（林璐菁攝）
没有评论:
发表评论