清場之後 - 左丁山
警察在金鐘清場，十分順利、和平，警察表現十分客氣，大概在幾百支鏡頭實地拍攝之下，警察早已知道要表現克制，勿貽笑大方，知名靜坐人士亦表現得有尊嚴，昂然起身行去警車，余若薇、李柱銘、黎智英等等皆如是，令人擔心嘅係何俊仁，電視鏡頭所見，阿仁似乎疲乏不堪，滿面病容，警察扶住佢行，仍然腳步浮浮，好可能與感冒或唔夠瞓有關，希望阿仁退場之後，回家好好休息。
次日午飯時，炒家X好唔滿意上述人士、議員等踢保，可自行離開警署，大聲質問警察為乜唔落「叉廚」（charge），是否有意放生？律師W就話：「警方一時之間都唔知叉廚佢地乜嘢罪，況且今時今日警方邊度敢孭飛吖，梗係將個波踢俾律政司，由袁國強啲夥計度橋嚟控告各位被捕人士啦。」
如果控告，李柱銘、余若薇、梁家傑三位資深大律師會否除牌？律師W話：「佢地坐在禁制令區域範圍外，最多告佢地非法集會，但佢地冇拒捕、冇使用暴力、冇講大話（dishonesty）否認，一般嚟講，法官會判簽保守行為，除非袁國強等人諗到其他更嚴重罪狀嚟控告佢地啦，否則應該不至於由大律師公會召開紀律聆訊，將佢地除牌嘅。」
但律師W即刻補充：「如果要玩政治，乜嘢都有可能。」玩政治就要睇梁振英心情咯，難以預測。之前曾與一位法律界人士碰頭，佢話曾經參加過吹風會，中聯辦中人在會上講外國勢力入侵，促請佢地注意及向外國朋友解釋有外國勢力搞鬼，呢位朋友Y聽到搖頭嘆息，但又唔想俾啲別有用心人士標籤佢為親佔中人士，都費事反駁，只好默不作聲，佢話都忍得好慘。佢話如果佢嘅港大法律校友袁國強都要受「啟蒙」，指有外國勢力唆擺佔中嘅話，咁港大法律學院或者要引通識教育科咯，講笑話咩！港大有咗個英國人校長，咪真係「外國勢力入侵」？愛國報紙猛咁向港大施壓要郁戴耀廷噃！佔領運動告一段落後，愛國陣綫與建制派必定推動秋後算帳，追擊佔領運動嘅搞手，掀起一場「文打鬥爭」為香港人腦袋「啟蒙」，啲左派寫手大有市場矣！
I
没有评论:
发表评论