http://hkm.appledaily.com/detail.php?guid=19203750&category_guid=15307&category=daily&issue=20150701
富臨集團楊浩宏 韓燒店靠團購響名堂
■楊浩宏指韓風強勁，「但吹到幾時仲未判斷到」。
作為富臨集團（1443）主席楊維之子，楊浩宏必然被貼上「富二代」、「靠父幹」的標籤，但他選擇走低調路線。加入富臨後，未有參與富臨傳統酒樓業務，反而到新發展的概念線擔任品牌發展經理，做擅長的韓國燒烤餐廳，希望可在巨人肩膊上幹出好成績。
去年才創立的炑八韓烤，屬於富臨集團概念線旗下新品牌。楊浩宏指富臨於數年前開拓概念線，「唔想獨沽一味做酒樓」，故發展酒樓以外的中外特色餐廳，但多年只有經營火鍋類餐廳。楊浩宏表示，畢業後他曾到韓國仁川經營海產批發生意，當時同韓國食材批發商建立了良好關係，對韓國餐廳亦有一定了解，「相信韓式燒烤一定有得做」，便在去年提出開設炑八韓烤。
盼學美心轉身快
炑八韓烤於去年在太子開設了第一間分店，「公司同事計過條數，太子個舖位咁啱可以用嚟試吓喎」。開店頭三個月的生意未如理想，僅靠團購維持人流，「都有啲驚，但係心裏堅信有得做」。餐廳在團購網上出售韓國醬蟹，楊浩宏指團購價是蝕本價，「為咗吸引人嚟冇辦法，但通常嚟得唔止食醬蟹，點都會燒吓其他嘢食，計番都係賺」。在數月後，餐廳知名度逐漸提升，生意總算收支平衡。
楊浩宏形容，炑八最大優勢是可以藉住富臨的網絡，以優惠價格採購食材及租下有利位置舖位，「傳統韓國人搞嘅韓燒店，拎到嘅食材都未必有我哋咁靚」。
但經營概念店與酒樓畢竟有分別，他形容挑戰更大，「韓燒嘅食材講求新鮮，冇得遮遮掩掩，而且餸頭餸尾都用唔着，唔似酒樓成隻豬咩部份都可以用到，食材成本至少貴酒樓20%。」
他坦言，韓風雖然吹得快、強勁，「但吹到幾時仲未判斷到」，期望集團的概念線可以做到如美心般快、在必要時「華麗轉身」。
相反，他仍然看好酒樓業務前景，「對中國人嚟講，大時大節始終會去酒樓食嘢，係好根深柢固嘅飲食文化，好難取代到」。
■炑八開業數月後達收支平衡。
學生時代回酒樓實習 學斬叉燒
【由低做起】
楊浩宏雖貴為富臨集團（1443）主席楊維之子，但他其實早於學生時代，已經常常到集團旗下不同酒樓及不同部份進行「實習」。他說：「一放假就會去幫手學嘢，乜位置都做過，水吧、斬叉燒都試過。」
早已習慣在廚房工作的他，在留學英國時期，更曾經為了賺取額外生活費，試過去星巴克做兼職。當大家以為「富二代」必然「想乜有乜」，他就用行動來證明世上沒有「免費午餐」。他說︰「你想要乜，就要自己賺返來去爭取囉。」
畢業後，楊浩宏未有即時入富臨幫手，反而到韓國搞批發生意。「當時有同學屋企批發海鮮，我見到覺得賣返香港有得做，就自己搞一檔，要落手落腳執海鮮」。雖然賺到第一桶金，但生意卻難以維持，「條橋好易俾人抄」；在韓國做生意的人脈，今日卻用於經營韓燒餐廳，總算無白費。
下一則: 新斗記仇祖薰 引入國產樽裝水
Z88
没有评论:
发表评论