【慌張西望】回到「OCT 26 1985」
今年重陽節，重點不在登高望遠，而是回到未來。就算閣下不是荷李活科幻電影《回到未來》忠實粉絲，fb也會被它攻陷，因「OCT 21 2015」正是Marty McFly穿越時空所達的未來之日。回顧這30年，科技是進步了，人際關係卻越見疏離，很多美好事物也不復來。遺憾是迄今科技仍未能穿越時空，杜秋棠唯有來個文字版「當年今日」，讓讀者返回「OCT 26 1985」，重溫昔日娛樂界的光輝歲月。
1. 阿倫隻《愛情陷阱》年度銷量40萬，《愛情陷阱》順勢奪得金曲金。今日仲有邊位歌星會出碟，大家又識得邊首歌？
2. 阿倫之外，仲有張國榮、陳百強、林子祥、許冠傑………樂壇百花齊放。今日除咗陳奕迅，就只有陳奕迅。
3. 外國歌星呢，當年最紅有MJ同麥當娜。今日係Justin Bieber同Taylor Swift。
4. 百變天后梅艷芳係台上造型百變。今日嘅百變天后係Angelababy。
5. TVB播緊《雪山飛狐》，有呂良偉、謝賢、曾江，全城追看。今日播《張保仔》，主角係邊個？
6. 當年小學雞係「打電話問功課」。今日用whatsapp問問題，再copy and paste。
7. 小學雞唔係睇緊《430穿梭機》，就係畀星爺蹧質緊。今日兒童節目變咗成人睇。
8. 咁有咩卡通片呢？係《我係小忌廉》、《叮噹》同《足球小將》。今日叫《多啦A夢》。
9. 仲記得《龍鳳呈祥賀台慶》？呢個時候楊盼盼同肥姐綵排ing了。今日都有《萬千星輝賀台慶》，但似乎唔夠「萬千星虧」吸引噃。
10. 無綫有「五虎將」黃日華、劉德華、梁朝偉、湯鎮業及苗僑偉。今日你要湊夠數都難。
11. 當年處境劇叫《香港八五》，堅係探討香港民生問題。今日做《愛‧回家》，問題係冇乜人睇。
12. 電影呢，當年冇乜所謂合拍片，而《夏日福星》狂收2800萬。同期上映仲有《殭屍先生》，埋單都收2000萬。今日港產片所餘無幾，大陸有套《港囧》，內地收十幾個億。
13. Well，當年有隊開心少女組，袁潔瑩、羅美薇、陳加玲、傅明憲青春無敵。今日就有隊FFx，講咗咩自己參透。
14. 當年任天堂發行《Super Mario》，超有錢先有得玩。今日人人玩《Candy Crush》，仲成日喺fb問人攞心……
15. 當年睇《Playboy》，梗係睇鹹嘢（好似係）。今日呢，仲有，但下年3月就唔再刊登裸女照啦。
撰文：杜秋棠＠抽水站
https://www.fb.com/freakingwestlook
I
没有评论:
发表评论