2016年1月23日星期六

講主播：每條毛都好重要

【擘開腦細個口】毛記主播逐個評　邊個被點名讚？

在一班毛記員工眼中，林日曦不苟言笑；至於一班主播在林日曦心目中，卻是有讚冇彈、不可缺少的伙記。

利君牙佢係一個我形容為菁英嘅人，有貴氣，喺分獎禮入面，跳舞同司儀背稿佢最快上手，仲要教埋人，好聰明。

黃慘盈一個非常乖嘅女仔，好雅典，好有禮貌。

東方昇寫稿同創作都係最出色，請佢返嚟係搞創作，但可能佢暗暗鍾意出鏡，而我喺天比高嗰陣，亦知佢鍾意做幕前，佢有咁嘅背景，對公司嚟講係好重要。

盤菜瑩子佢係最用心經營自己image嘅一個，呃like最勁。有同事問我應該點答傳媒話佢整容？呢個年代整乜有咩所謂？我話寫咪寫囉，唔好當我係樂小姐！

羅若Off

好𡃁妹，我知我平時冇乜笑容，但佢係零零舍舍特別驚我，聽同事講，我同佢講完嘢，佢會無啦啦喊。

Dickson

一個好有才氣嘅人，睇佢寫嘢就知。佢呢一世一定媾到女，唔知等幾耐，但最終會有女人識得欣賞佢。

崔建芒

平時台上有自信、超寸，但佢對住我哋係冇乜自信，講嘢都唔係好敢，吞吞吐吐咁，但正正係咁，佢一上台就係全場最有自信嘅一個，咁樣先係佢犀利之處。