通街垃圾如廢墟 全城斷水電 居民落街沖涼
【本報訊】不知就裏的人，這天來到，還以為澳門曾經發生海嘯。昨日澳門市面猶如廢墟，多條街道佈滿雜物；被吹倒的樹木、鐵皮，甚至有樹木橫卧在巴士車頂。垃圾傳出陣陣臭味，蚊蟲亂飛，衞生情況惡劣。災民不分階層，幾乎全澳門都受停水停電之苦；價值千五萬的豪宅單位，同樣在風災中家園被毀。
記者：譚靜雯
澳門部份地方昨晚仍未有電力供應，居民被迫一家大細落街沖涼。 《蘋果》記者攝
澳門昨日仍有大部份地區停水停電。居於黑沙環的冼先生表示，由昨晨至中午，已落街排了五輪水，「每轉至少都要排40至45分鐘」。他憶述，前日中午12時至晚上9時都沒有電力供應，下午3時更開始斷水，至昨日已逾20多小時無水供應。他家中有6個月大的嬰兒，無水供應對一家人生活影響很大。
千萬豪宅爆窗
冼慨嘆稱，澳門政府善後工作未如理想，「見唔到有乜嘢好具體工作，都係靠居民自己攞水，估唔到今時今日澳門咁發達嘅地方，仲會因為一個颱風連水、電、煤都冇」。
在黑沙環豪宅「寰宇天下」外的取水點，大批居民排隊取水，出動膠桶、甚至大水樽輪水。澳門人劉小朋友表示，家中由昨日凌晨1時開始至今已無水供應，「連廁所水都冇」。幸好家中有小量儲水才捱到早上。她家中的玻璃窗更被強風吹至爆裂，「雨水飛晒入屋」。
寰宇天下見證了天鴿的威力強勁，現場所見，大廈低層至中層單位玻璃窗全部被風吹爆，成幅玻璃幾乎無一處完好，有專家指或與採用非強化玻璃有關。居民鄧先生家中玻璃窗爆裂後，一家六口被迫走落樓下停車場逃難。他又形容，爆玻璃時「成間屋搖晒、震晒，啲孫好驚攬住晒」。
鄧需要用手提石油氣爐煮食，「回復番幾十年前嗰個年代，點蠟燭食飯囉，咁文明嘅時代竟然要變番咁」。另一位寰宇天下居民Ricky亦表示，風暴期間「間屋搖得好勁，好似地震咁」，住客紛紛落大堂避難。他批評政府在打風後「完全冇安排」，又指「最慘有鄰居BB無水開奶，真係好慘」。另一重災區十月初五街，昨晚仍然無水供應，有居民須利用街喉取水沖涼。
澳門能源辦主任許志樑表示，昨晚仍然有3萬多戶的用電未能恢復供應。主要由於用戶端一些澳電或客戶的供電設施受影響，未能修復，需要澳電工程團隊逐步清理和檢查維修；由於供電仍然未完全恢復，他呼籲市民共同節約用電。
至於食水供應，昨日澳門半島及氹仔地區陸續恢復供水。當局表示，青州水廠昨晨已完成泵房抽水工作，今日凌晨後可恢復投產，開始供水。
澳門大停電，十月初五街附近入夜後一片漆黑。
豪宅寰宇天下不敵風災，一整邊單位的玻璃窗受損。
天熱細菌滋生
即使食水問題解決，澳門災後問題仍然嚴峻。澳門網媒「論盡媒體」報道，洪水退去，澳門低窪地區的商戶開始清理雜物，不少居民將被浸壞的貨物丟到街道及垃圾桶旁邊。垃圾堆未能立即清走，內港至沙欄仔一帶內街的垃圾，兩步一小堆、五步一大堆，隨處可見，且有陣陣臭味。有協助善後的義工表示，昨日澳門天色已轉晴，溫度上升，「政府再唔清走啲垃圾，令細菌滋生，擔心會出事」。
Z88
没有评论:
发表评论