蘋機會：《Battleship》隱藏結局 人肉揪贏異形
444
一齣劇情無謂兼犯駁嘅科幻特技片，全球票房居然連勝，唔使講都估到係《Battleship》全靠神級CG特技食糊。藍光版剛上市，120分鐘「正場」轟炸得不亦樂乎，若你覺得古董艦戰勝外星科技係無可能嘅話，Bonus隱藏結局話主角同㗎仔艦長憑肉身趕走外星人，應該更難接受。記者：陳國輝
炸斷中銀超逼真
用外星侵襲地球嘅題材為背景，實情多如繁星！故事都幾老土，大概話有班外星人因收到美國發出嘅衞星訊號，所以想將地球變成佢嘅殖民地，同一時候，喺太平洋進行聯合軍演嘅美日艦隊，剛好就遇上呢班入侵者，唔使講最後咪打起上嚟囉！
整套戲120分鐘，大大話話近四分之一時間用嚟交代人物、背景，起初我都頂唔順，但正式進入戲肉，即係由出現香港寶蓮寺天壇大佛一幕開始，之後無晒冷場！佢比起當年《蝙蝠俠：黑夜之神》同樣搵香港做背景，今次明顯震撼得多，尤其外星生物直墮中環地面，將中銀大廈完全撞散嗰刻，身為香港觀眾，真係睇到有啲心寒；而另一部份跌落會展海旁產生嘅強烈撞擊聲，如果你搵部靚嘢重低音細心欣賞，會發現厚重嘅海浪聲，加埋刺耳嘅浪花效果，感覺逼真恍如世界末日！
■好彩只係擦身而過，無對重要景點造成破壞。
■終極一戰由古董戰艦激鬥巨無霸太空船，劇情好牽強。
■外星生物唔只似人類，還穿上保護裝甲，創意唔強囉！
■女主角Rihanna戲份唔多，性感暴露鏡頭當然No Way。
Bonus睇另類大結局
睇完120分鐘，只不過做完熱身咋，事關Blu-ray碟所收錄嘅內容也相當豐富。最值得戰艦迷回味，一定係介紹船艙和武器部份，訪問完導演Peter Berg，佢仲會親身走入曾駐守珍珠港嘅美國海軍驅逐艦「密蘇里號戰艦紀念館」，介紹呢名已滿70歲嘅「主角」威水史，Bonus內唔只提供真實片段，還有當年首度出航嘅黑白照片，肯定啱粉絲回味！而特別欣賞劇情嘅老友，碟內亦收錄三段未曝光結局版本，畀你睇完再睇。片長約20分鐘，包括兩名型男如何憑血肉之軀戰勝太空船等，至於詳情係點，梗係留番你買碟返去睇啦！
今次《Battleship》分別推出普通版及鐵盒裝兩款，雖然以往鐵盒勁多人搶，但有DVD店負責人話，可能兩者Bonus都無乜分別，同時差價只有$50，故暫時都未出現炒價。
■以前兩個乜都爭，到結局梗係同心協力救地球啦！
■外星人隻手可不停轉換武器，Bonus也有詳細介紹。
■密蘇里號當年出征二次大戰嘅黑白照，大家都會睇到。
《超級戰艦：異形海戰》（Battleship）
音效：杜比數碼5.1
畫面：2.40:1
特別收錄：決戰時刻、戰艦的視覺刺激、探訪二次大戰戰艦「密蘇里號」
■外星生物直墮會展海旁產生嘅強烈水花，好鬼逼真。 
■好彩只係擦身而過，無對重要景點造成破壞。 
■終極一戰由古董戰艦激鬥巨無霸太空船，劇情好牽強。 
■外星生物唔只似人類，還穿上保護裝甲，創意唔強囉！ 
■女主角Rihanna戲份唔多，性感暴露鏡頭當然No Way。 
■以前兩個乜都爭，到結局梗係同心協力救地球啦！ 
■外星人隻手可不停轉換武器，Bonus也有詳細介紹。 
■密蘇里號當年出征二次大戰嘅黑白照，大家都會睇到。 
（左）$268（鐵盒版）（右））$218（普通版） 
没有评论:
发表评论