蘋機會1：錢途有限 回憶無限
玩得相機，都知Leica、哈蘇呢啲大牌夠矜貴，但其實大把當年勁牌型機，家好多後生都未聽過見過。兩個相機界前輩儲機儲到一屋都係，其中葉偉強師傅更型到話：「我只儲平嘢！」因為已成為他的非賣品，即使升值也不賣，而相機內藏的攝影歷史，帶給他無限的回憶，比實質價值更重要。
記者：韓繼聰、陳國輝 攝影：林栢鈞
■年屆79歲「高齡」嘅Leica 0-Series仍可正常運作。
全球最貴古董相機 2,160萬港元成交
所謂收藏價值，除咗歷史情感與獨有嘅人情味，無疑又會涉及市場價值，難怪古董相機一直有班全球愛好者熱捧，令其拍賣價屢創新高！
好似今年五月喺維也納舉行嘅第二十一屆WestLicht攝影拍賣會（WestLicht Photographica Auction），就係古董相機愛好者必爭之地，而今屆最矚目嘅絕對係機身序號為116的Leica 0-Series，當時底價只係30萬歐元（約300萬港元），但成交價竟然超過底價七倍，以2,160萬港元成交，成為史上最貴嘅古董相機。
■WestLicht會評價相機狀況，例如這部Leica 0-Series就評為B-。
■機身油漆仍保留1923年的古典味，未作任何修飾。
比港島豪宅更貴嘅原因，或在於其代表性和罕有程度。據WestLicht官方介紹，Leica 0-Series於1923年生產，全球只得25部，而且作為實驗機，亦唔會公開發售，目的只想測試市場對35mm相機嘅接受能力，並為兩年後推出嘅Leica A打下基礎，至於對該品牌日後發展，絕對功不可沒！
■WestLicht攝影拍賣會由2002年舉行，拍賣品除相機外，還有攝影作品。
Giroux Daguerreotype
全球第一部量產相機，1839年正式推出發售。外觀奇特，更以黃銅和木材製造，2010年以732萬港元成功售出。
Leica 250 FF
1933年生產嘅第一代記者專用相機，當年全球限量僅250部，而呢一部由於保存非常新淨，WestLicht更評估為A-，令今年拍賣價以120萬港元成交。
Leica MP2黑色版+合金版
Leica第一部裝上電子馬達驅動器嘅相機，產於1950年，據知黑色版全球只有五部，現時僅存四部，此機於2010年以402萬港元拍出。到2011年，同型號嘅MP2合金版更以新高出售，成交價達到528萬港元。
香港將拍賣：Leica Luxus I 估值達180萬
古董機發燒友又唔使流到一地口水，皆因英國拍賣行邦瀚斯Bonhams將於11月23日，在香港進行亞洲首個Leica相機珍藏拍賣會，產品主要來自Leica，也有少量Canon、Nikon及其他相機配件，當中最矚目是機身序號為48048的Leica Luxus I，它產於1930年，配備一支50mm f/3.5 Elmar鏡頭，機身還覆蓋一層仿蜥蜴皮，復古味濃。Bonhams預計估值由120萬至最高180萬，但見Leica 0-Series以破底價七倍成交，它隨時唔止呢個價！
■背面也包上一層仿蜥蜴皮，不失一份高貴感覺。
■估值最高係呢部機身序號48048的Leica Luxus I，高達180萬！
拍賣詳情
日期：11月23日
時間：晚上8時正
地點：金鐘香格里拉
收藏達人一號：葉Sir
葉偉強師傅（葉Sir）是天祥影集話事人，起初從事菲林冲曬工作，十多年前開始轉做修理、買賣、寄賣二手相機，從此收藏古靈精怪的相機及鏡頭。
唔儲貴機 只為時代作見證
「我從來唔儲貴機，一來自己唔係有錢佬；二來其實好多平機一樣有佢獨有嘅歷史意義。」葉Sir笑談佢嘅儲機心得。其實佢講得好有道理，貴機名牌機一向大把人收藏，多佢一個唔多，相反一啲平價機，好多人當垃圾，掉一部少一部。「可能自己咁多年都從事與攝影有關的工作，總希望盡點力去保留一些與攝影有關的歷史。」葉Sir邊摸着手上的舊相機邊笑說：「這部香港製造的HALINA相機，係少有專登去搵來收藏的相機，家有幾多人知香港原來出過相機？傳聞部機於1965年只賣$65，我十幾年前聽啲前輩講起，就試吓周圍去舊地攤搵，結果十幾蚊買咗，好Cheap，但好有歷史意義。」
問葉Sir啲古靈精怪嘅收藏喺邊度搵番嚟，佢話原來唔少都係機緣巧合，甚至買錯番嚟，亦有更多係朋友熟客相贈，甚少專登去搵，他多年來不時上網入貨，「當年網絡無咁發達，Post出嚟啲相好細，經常買錯嘢。」另外，葉Sir亦有個習慣，就係朋友送嘅機絕對唔賣，「數碼相機興起時，好多朋友唔要舊菲林機都送畀我，我覺得特別嘅就儲起，既然免費得嚟，我亦唔會賣出去。」久而久之就越儲越多，家已經有近千部收藏。
■呢部香港製造的HALINA相機，絕不值錢，造工亦十分粗糙，但歷史意義十足。
■機底「EMPIRE MADE」字樣，可見證香港變遷。
最愛褔倫達小機仔
呢部係葉Sir最愛之一的褔倫達小型相機，外形有型又古典，「佢嘅木紋好靚，成個設計好有當年傢俬設計的感覺，攞上手好有回到當年的感覺，加上有Carl Zeiss鏡頭，影相一樣掂，所以好愛佢，但已不記得用多少錢買回來！」
■雖然只係小相機，但一樣用Carl Zeiss Tessar鏡頭，質素有保證。
珍藏品一覽
鬼罕：F1.5巨光圈長鏡
呢支鏡嘅牌子叫Soligor，中文名叫秀麗，雖然寫住Made in Japan，但其實鏡頭是由德國設計。這支巨炮焦距135mm，擁有F1.5的巨大光圈，現今好多鏡頭都無咁勁。葉Sir更話佢咁多年都只係見過只此一支，鬼罕！加上鏡頭的鏡片透光率好高，以七十年代來說實在相當驚人，最正係家加轉接器一樣可以用得。
Soligor
■135mm F1.5呢個數字就算家睇都相當驚人。
■攞上手，裝上相機，就知呢支鏡嘅Size有幾誇張。
拍賣級古董：Exakta 120
除了Leica之外，Exakta其實都屬德國嘅經典牌子，而呢部120相機更係少有。可換鏡及換背設計在六十年代相當新穎，加上當年產量極少，如果保存得好的話，可以變成擺放博物館的拍賣級古董。「可惜我呢部已經溶溶爛爛，但當係俾人睇吓當年嘅精巧設計都幾好呢！」葉Sir笑說。
Exakta 120
Contarex相機連三鏡
Contarex是Contax前身，旗下靚鏡出晒名，皆因鏡片含銀鍍膜，透光率奇高，葉Sir話即使到家，Contarex啲鏡都仲可以講係No.1。佢手上呢Set三鏡一機，齊章一套較難搵，呢Set殘殘哋嘅都值八萬元左右，保存得好的話，一定過十萬元。
Contarex連三鏡
超前科技：Canon Pellix
Sony剛剛玩半透鏡單反，原來Canon早喺十幾廿年前已經玩過，設計大膽創新正正係佢嘅價值所在。
Canon Pellix
實用外形靚：Rolleiflex
問葉Sir甚麼牌子相機最好儲，佢就首推Rolleiflex嘅雙鏡機，話佢夠實用兼外形Classic到爆，靚仔非常，攞出街影相當然夠品味，放屋企睇亦恍如藝術品一樣，加上價錢唔貴，係入門好選擇。而Rolleiflex嘅雙鏡機好多外表都差不多，要儲較罕有的，不妨多留意鏡頭種類，好似葉Sir呢部係Xenotar鏡頭，係較少有的一部。
Rolleiflex
上一則: 男人也要男人香
没有评论:
发表评论