蘋果日報- 我行我素4：素食者通常癲癲哋!

我行我素4：素食者通常癲癲哋!

致電給「素食青年」群組發起人動物仔，本來的如意算盤是叫他找兩個朋友，每人介紹一間素食餐廳，最好一個下午完成所有拍攝採訪。電話那頭的素食男卻說：「我好少去餐廳，話明青年，我無乜錢，不如……」省略號的內容，直接要我一早起床去西貢碼頭，跟他乘船往鹽田梓跟區紀復做義工。

記者、攝影：劉嘉蕙

Raw版柯震東

其實動物仔「不如」些甚麼呢？開估：「……不如你講吓食素點樣影響人際關係啦，我好慘㗎，成日俾人鬧，啲人呀，乜都問得出……」例如？「問我女朋友如果食肉，我會唔會咀。」

前兩版David說，香港素食人口是2.4%，而我當然是另外的97.6%，入秋想吃大閘蟹，氣溫跌幾度就要打邊爐，難得去一次西貢，我乘車途中就預先構思要買魷魚絲還是蝦乾，食肉者，大概都是想這些的。上午九時半，人在西貢海鮮檔等着等着，傳說中的動物仔出現了，他的故事你或者在一些傳媒報道中看過，大致是──今年二十五歲，十四歲時跟阿媽去街市，看到人家斬雞，覺得殘忍決定茹素，早排一時貪得意在面書開了個「素食青年群組」等等。為打破一般人對素食者的羸弱印象，他把自己練得很大隻，「啲人會歧視，我一病或者身體邊度痛邊度痛，啲人就會話：『梗係你唔食肉啦。』」之前本報港聞版訪問過他，說他是「素食筋肉男」，他主動提起，說好好笑。其實我覺得，用筋肉男來形容，想像空間不夠大，以我身為女生的視角看來，動物仔真人，其實是Raw版柯震東。

■面書越來越多人，動物仔索性做個網頁：「我搞素食青年嘅原則係盡量唔花錢，So far以幾千人嚟講，氣氛算唔錯，係大家嘅功勞，唔淨只我一個人。」（www.veggieyouth.org）

同枱食飯標籤善惡

我心裏盤算該何時逼供：「如果你女朋友食肉，你咀唔咀得……」但因為虛偽，口總是問別的，直至去鹽田梓的船來了，他一隻腳叉上船，竟率先打開話匣子：「素食者通常都癲癲哋，因為食得素嘅人通常都好執着，唔固執點堅持素食？食一餐飯都俾人問幾十條問題！俾我揀，有時都唔想同素食者做朋友，因為，嗱，我唔係話全部呀，有啲素食者真係難相處啲，我執着時你又執着，頂唔順朋輩壓力返轉頭食番肉嗰類人，通常比較好相處。」為「叛徒」講好話，誠大將之風也。

動物仔說：「十年前開始食素嗰陣，社會比家更盟塞。」有素食者反應過激，很容易同枱吃飯出現口角，他見過很多類似場面，因此學會避，「講句嘢都小心到爆炸，講食素，我好少從健康角度講，拗唔完嘅；亦唔會從宗教或政治角度講，群組一出現相關嘅Post，即刪。」我不禁回想自己人生中難得幾次跟素食者同枱食飯的經驗，好像都小心翼翼的吧，「討論素食肉食，好易會標籤到善同惡。一講素食呢回事，就好容易畀到人一個諗法，暗示食肉係唔啱，咁就會衝擊到其他人。」他心水很清，「我唔介意人哋食肉，我介意係家啲人太鍾意食肉，一條菜都無。點解餐廳會無菜食？成個世界，植物種類一定多過動物，肉類淨係得豬牛羊雞。其實賣肉食係唔係好好搵？我估唔好搵，你諗吓，種一棵菜畀自己食要花幾多氣力？而一隻動物又要食幾多植物先養得大？古代人好難食到肉，可能一年先食得一次，點解家變得咁易？背後一定有景轟，不過我唔知係乜，我唔想抹黑人。」

■因食素而認識女朋友Sandy，早幾個月結伴接受副刊訪問。

■現在一有空，動物仔就跟區紀復學習起屋。

■自製慳水洗手法，在膠樽上穿一個洞，滴滴仔也能洗手。

■義工們分享自備午餐，清一色是素。

■區大哥自己做的豆渣餅乾。

■大自然處處有食物，只是都市人的眼睛看不見。

入齋舖溝女易

到達鹽田梓，上岸即見賣魷魚絲和蝦乾的檔口仔，我本能地嘩一聲叫出來，動物仔顯然不知道我嘩甚麼，因為他只瞄向魷魚絲檔底下的一隻貓，原來食菜和食肉，別說同枱吃飯，　單是一個眼神已有差異，這確切引證他所說：「一開始食素，你諗嘢嘅角度會唔同晒。」非素食者看素食者，會認為這是一次性決定，且只在餐桌上生效，動物仔卻告訴我，食素會纏住思考不放，「你會開始問好多問題，例如見到螞蟻，你會諗好唔好踩落去？人有醒覺，諗得越多，會越有同理心。」

談得興起，是時候問那個想問很久的問題了，我問：「其實女朋友食肉，你咀唔咀得？」「哈，家我女朋友都係食素。」她女朋友叫Sandy，是在齋舖認識的，「食齋其實好有市場，你諗吓男女比例係幾多，無可能係男仔多，如果個男仔食齋溝唔到女，係佢有問題。現實講，食素嘅女仔通常都靚啲皮膚好啲。」聽到此，我開始懷疑他搞「素食青年」的動機，「我講笑咋！死啦，我咁講，咪個個麻甩佬衝晒入齋舖？」更多人食素不是好事嗎？「都係嘅，但我想健康咁發展。」

「食素者成日俾人標籤係善人、環保人，我覺得自己係邪惡化身，亦唔夠環保，好驚啲報紙綠色版訪問我。」他搞「素食青年」，原意是結識食素朋友，壯大力量，去到現在群組有四千多人。忽然間，所有關於素食的事都來找他，他驚覺自己洗濕了頭，「明明我乜都無講，做乜突然間挑戰我？無啦啦俾人擺上神枱。我想講嘅係，素食其實係普通事，有人話食素係好好嘅事，我覺得唔係，只係無咁唔好，唔好神聖化我。」他自言普通，其實他在做很少二十五歲後生仔會做的事，包括不因健康理由食素、不正正經經打份工、無啦啦對《蘋果日報》副刊記者說那麼多。他的心願，是世界倒轉行，「我成日俾人話：『點解唔搵份工？』我希望未來啲人會調轉諗，會問：『點解你唔去做有意義嘅事？點解唔去幫人？』家社會好奇怪，一塊餅分十份，大家唔係想平分，係想有咁多要咁多，可唔可以調番轉？平均分配就無人餓死。」你想革命？「呢個唔係革命，我覺得，係和平思想應該有嘅態度。」

■區大哥在台灣的生活營，追隨者眾，最近準備將簡樸生活理念移植到香港。

■想了解區紀復思想，可看其著作《愈少愈自由──鹽寮樂修二十年》。

食素都要用腦

動物仔帶我去鹽田梓，其實是幫區紀復起屋，人稱區大哥的他實踐生態靈修幾十年，在花蓮開創「鹽寮淨土」，跟隨者要在大自然修行，採摘種菜燒柴煮飯。他最近在鹽田梓找到一間廢屋，找義工幫忙打造一個類似「鹽寮淨土」的空間。採訪當日，一夥人才剛用竹搭起廚房，他說：「我歡迎大家同我一齊生活，但有個基本條件，你唔可以帶肉，我食乜你就跟我食乜。」

區大哥不是天生下來就決定食素的，他今年七十歲，年輕時唸化工，畢業後在大機構任化學工程師，一日驚覺自己所做的事對地球有害，就在四十二歲那年辭職，「離開工作後，我反省人生係乜，以後生活要行邊個方向。」其時他閱讀John Robbins寫的《Diet for a New America》，茅塞頓開。John Robbins是美國雪糕公司Baskin Robbins創辦人之子，去過牛場看工廠如何取用牛奶後，決定食素，「我都去過唔同國家，睇人家點樣飼養動物，動物知道要去屠場會露出淒慘之色，令我有感性想法。理性啲講，健康嘅人都食素。」他最後有結論：「既然食素對自己有益，利人利動物利環境，點解唔食素呢？」茹素廿五年，他自覺身體健康，「我三十年無睇醫生，你講得出嘅病我都無，雖然我瘦，但無負擔，我去邊都得，你得唔得？」另一大發現是，素食就心靜，「素食之後，你就會好安靜，可以思考好多人生嘅事。」

區紀復說：「素食要配合環境，如果你好忙好有壓力，效果可能唔好，要靜下來先可以素食。同伴都好重要，後生仔世界太多引誘，要見夠世面，先唔會輕易被好奇心支開去。」說難不難，說易不易，「素食唔係咁簡單，要經過思考，當成生命一個方向、重點，先有力量。有啲人素食不求甚解，人哋話係素佢就食，結果被假素雞素鴨呃咗。素食都要有頭腦，唔係人講就要信，要自己判斷；好多名詞好容易呃到你，好似『有機』咁吖，唔係有機就好㗎，我讀化學，有機都會有毒！」

上一則: 我行我素2：周一無肉之歡

下一則: 非常人：執導演筒　廢青暫別舞台