■陳雲不認為包圍水貨客的光復行動是「批鬥」，「只係協助警方執法」。陳奕釗攝
【隔牆對論】
記：《蘋果》記者 陳：陳 雲
政府計劃出招確保「港人港奶」， 各界提出《儲備商品條例》、中央訂購熱線、限制一簽多行等方案。但水貨客越搶越烈，繼續佔領上水港鐵站外，日以繼夜排隊拆箱入閘等過關，港爸港媽依然一罐難求。
記：甚麼招數才能有效確保「港人港奶」？限制內地人在港買奶粉，是否有違自由經濟？
陳：如果用儲備商品法，商人冇得囤積，可穩定供應，但（內地人）都會照落嚟買，唔係有效方法。練乙錚提出開徵奶粉離境稅更有效，可令佢哋即刻停止。香港政府如肯打擊跨境走私，即刻拉人，已可解決問題。
你話自由買賣，佢哋係觸犯咗中國海關嘅關稅法例，係走私。喺呢度買嘢嗰一刻係自由買賣，（但）離境時犯中國法律。香港海關都可以捉佢哋，水警都有截「大飛」捉偷運iPhone。荷蘭係自由貿易鼻祖，一早都實施限購令，每人限購四罐。
記：澳門政府讓居民登記後確保每月買到五罐奶粉，這方法值得參考嗎？
陳：咁做係配給制度，將責任擺喺本地人度，唔係擺喺外來滋擾嘅人度，本末倒置。配給，係一個戰爭時間淪陷（時期）嘅做法。佢哋今日買奶粉，第日買衞生巾咁點算呀？再配給呀？衞生巾配給，係監獄、集中營嘅做法。我嗰日同鄭家富、吳志森吵得咁緊要，因為居然有民主派意見領袖咁嚟鼓吹屈辱香港人嘅制度，係匪夷所思㗎！
■「光復運動」被指過火，陳雲卻認為是合理的反擊。
搶奶粉風暴，令中港矛盾再次升溫，「光復運動」衝出上水，怒民包圍旺角的商店，在港鐵站外圍堵水客，拖着大型行李的香港人也無辜被圍。
記：周日的衝突似批鬥，港人也被誤中副車？行動有否過火？怕不怕擦槍走火？
陳：佢哋唔係批鬥，係協助警方執法。任何一個地方受到挑釁、壓迫，都會採取合理方法反擊，保衞自己。我哋冇槍，點走火呀？點解啲人唔擔心有車仔亂衝嘅人會撞傷香港人呀？點解擔心香港人防衞時會撞親佢哋呀，本末倒置成咁呀！
（被度行李的港人）嗰個係一個好孤立嘅例子，但誤中副車嗰個人，都係違反咗港鐵附例。佢值得同情，但佢之所以受到人哋唔客氣對待，係因為香港以前有開嗰個容許大家有少少違規嘅「寬鬆度」，已經俾水貨客霸佔咗。例如𠵱家少咗香港人拖住行李搭東鐵，怕俾人誤會係走私客，可能去咗搭巴士啦。
■跨境學童迫使部份本地學童跨區就學，陳雲狠批政府故意「唔做嘢」。
老店利苑粥麵結業、D&G禁攝風波、廣東道變天，自由行令香港出現人滿之患，香港人的生活空間不斷受擠壓。
記：自由行湧港，令你的生活有何影響？
陳：唔可以喺地鐵站等人、平時我去開買平嘢嘅地方已唔去，價真棧唔去，百佳、惠康繁忙時間我一定唔會去。鬧市我唔去食飯啦，已經冇平嘢食。我有兩年冇行銅鑼灣，誠品、海洋公園、迪士尼我唔去。唔想見到大陸人橫衝直撞，盡量避開，我唔想打交。
記：自由行及雙非問題，對香港人有何長遠影響？
陳：雙非人問題、跨境學童霸學位、深圳取消香港雙非人學位，逼佢哋落嚟，開闢新界東北、準備取消邊境，佢哋一路落嚟香港。搞到香港人唔敢生仔，因為學位有問題、奶粉有問題、床位有問題，生存環境惡劣；地產霸權，自由行無止境消費，令舖租好貴，本地嘅消費冇咗空間，鬧市搵碗麵食都冇，麥當勞都冇。咁嘅環境，有能力嘅人都會走。
佢成個過程係要用大陸旅客、雙非人排擠香港人，令香港人唔願意住喺度，離開香港。任何一個正常政府，都會保護本土利益。如果好多人入去上海搶購奶粉，上海市政府都會採取行動。但我哋呢個係一個賣港政府，受中共殖民統治排擠香港人口，所以佢係唔會做嘢！
自由行湧港搶購日用品，背後問題是內地毒奶粉、毒食品為患，有社運人士、議員認為他們也值得同情，卻被陳雲狠批。
記：為何批評同情內地人的為「左膠」？
陳：中國遭受共產黨橫暴統治之後，永遠都係第三世界國家，永遠要接受國際援助。但香港援國能力有限。你以為我冇同情心咩？我係道德現實主義。必須採取現實立場，就係我哋物資唔夠。大陸人食奶粉，唔應該由香港負責。
没有评论:
发表评论