2013年3月21日星期四

壹週刊 - 1202 - NEXT 3.0 工作•家

 

Joelle Woo
微軟香港市場及營運總監
平時唔係太多文書工作嘅話, Joelle最鍾意攤喺梳化睇住風景開工,認真寫意。

工作•家

IGOSSIP

CLOSE-UP

工作•家

新官上任三把火,好似 Yahoo!新 CEO Marissa Mayer上位未夠一年,最近就發內部通告知會員工三個月後一定要返公司做嘢,唔可以再遙距工作。
禁令一出, work from home模式即刻成為全球熱話,正方認同 home office既冇工作效率,亦影響團隊精神;反方就話慳番搭車返工時間先至夠 efficient同最環保。
究竟備受打工仔歡迎嘅 home office模式係好係壞?又聽吓香港一班過來人點睇?

彈性上班

美國有近一成打工仔 work from home,一星期只返一兩日公司,其餘時間屋企當 office。同樣來自美國嘅微軟,又出 Windows 8又有 Windows Phone,仲有 Surface平板電腦,軟硬件齊晒,點睇都好啱俾員工 work from home。任職微軟香港達十三年嘅 Joelle,就話遙距工作好 flexible,「一向以來公司冇硬性規定返工時間,個女要考試,可以喺屋企開工兼幫佢溫書,仲試過連續兩日冇返過公司。」
作為管理層,唔驚下屬作反 hea做?「公司文化並冇將時間同工作量掛鈎,工時長唔等於做得多。全靠員工自律性,大家都係成年人,唔使吓吓管住。」不過, Joelle話 work from home反而有機會做得更長時間,「喺屋企做嘢冇收工時間,有時做到忘形,會由朝做到晚,好彩老公同囡囡冇投訴。」

全程錄影

成間公司個個都彈性上班,點開會傾嘢? Joelle話公司已經冇裝枱頭電話好耐,要搵人就用番自家出品軟件 Lync,「功能有啲似 Skype,可以 send message同視像會議,亦可以同時開住份文件傾點改,最正係可以錄低成個聲畫討論過程,俾缺席嘅同事睇番。」
上網速度愈來愈快,亦有助遙距工作,「資料擺晒上雲端儲存,隨時可用電腦、 tablet同手機睇同修改,連 USB手指都慳番,唔使抄來抄去。」 Joelle慨嘆當年 56K上網,又要駁線又要等餐死先 send到份文件, conference call就更加只係得把聲,睇唔到對方個樣,今時今日就真係方便好多。

出咗街要開臨時會議,藍牙耳機就大派用場。

駁埋 speaker開會,方便雙手可以繼續控制電腦。

時間規劃

Celia
旅遊專欄作家
屋企嘅書枱同書櫃係特別訂造,分門別類擺好參考資料,企理得嚟又提高工作效率。

好多人以為旅遊專欄作家,唔使返工會好自在,可以日日瞓到黃朝白晏。不過, Celia話最大難度就係要戰勝自己懶散心魔,冇自我管制能力,一定做唔好呢份工。

變身作家

成為全職旅遊專欄作家之前, Celia曾係一間大型零售公司嘅管理層,原本前途錦繡,但六年前突然劈炮唔撈,「因為頂唔順辦公室政治,又想工作得自在啲,人工已經唔係考慮因素。」辭職後開咗間樓上鋪賣手工藝品,「開業年幾,每個月都穩袋幾萬,但睇鋪好困身。咁啱因為開鋪識得出版社嘅人,佢問我成日去旅行有冇興趣出書,所以四年前決定摺埋間鋪,專注寫旅遊專欄。」
Celia五年內出咗十五本旅遊書,同時又為唔同媒體寫旅遊稿,都算多產作家,最大秘訣係識得好好分配時間,「以前識一位行家,大細 jobs都接,點知唔識得自我規管,時間分配亂晒龍,成日遲稿或交 hea稿,搞到冇人再敢搵佢做嘢,所以我就好睇重時間。」
多得以前做過管理層, Celia自認好識得分配時間,「識得用盡每一日,每日八點半就起身,洗完面刷完牙之後就開始做嘢,唔會鍾意瞓到幾點就幾點。」咁同返 office有乜分別?「其實差唔多,每日平均都會做八、九個鐘,但編日程表嗰陣會加插睇電影、休息之類嘅時間,又唔使面對辦公室政治同埋逼車返工,舒服好多。」

寧缺勿濫

之前試過手機裡面嘅資料無端端唔見咗,所以除咗將日程表輸入手機,仲會寫落記事簿,萬無一失。

自稱完美主義嘅 Celia,每份工都會盡力做到最好,所以一定會編好工作日程,「唔單只會將工作輸入手機,仲會寫入記事簿,提醒每日進度。如果唔夠時間,寧願賺少啲唔接,都唔想交 hea稿,整臭自己個名。」

公私不分

April
電腦系統管理員
而家有時間做埋學校家長會幹事,可以更了解琳琳喺學校嘅生活。

喺旅行社做咗六年電腦系統管理員,曾因為工作太忙,冇時間陪老公同讀緊小四嘅囡囡(琳琳)而遞信辭職,最後得公司挽留,批准 April喺屋企遙距工作,家庭事業同時兼顧。

地獄工作

以前 April會用地獄嚟形容公司,「當時負責嘅工作好廣泛,唔單只要監控公司電腦系統網絡,仲要打電話俾唔同國家嘅客人溝通,朝九晚九開工好平常;而且假日有團嚟香港都要隨時幫手,三更半夜收到 call都要開工,好難抽身照顧屋企人。」 April話唯有請工人湊女同做家務,「老公好體諒我,冇詐型,但見琳琳同工人玩好似仲開心過對住我,就知道唔可以咁落去。」

效率提升

兩公婆商量後,認為層樓仲有幾年就供完,就算 April辭職唔做都勉強生活到,所以決定自己湊番個女。不過, April老闆極力挽留,仲提出可以俾佢減薪,留喺屋企遙距工作,「最後接受咗個 offer,平日送完琳琳返學,就會返屋企做嘢,由於唔使再掂前線工作,工作冇咁濕碎,快手好多。以前要一日先做得完嘅工作,而家半日就搞掂,老闆好 buy。
「雖然人工少咗,但可以喺屋企遙距監控,可以有更多時間湊琳琳返學放學同埋做家務,一舉幾得,老公又開心。」雖然只係轉咗半年,但同琳琳嘅關喺明顯改善,「而家每個禮拜都會帶琳琳返游泳班,佢又會主動叫我帶佢去跑步,以前都唔知原來佢咁鍾意運動㗎。」

給力傢俬

要提高喺屋企做嘢嘅工作效率,最好先營造一個整齊舒適嘅工作環境,枱枱櫈櫈辦公器材全部要揀得有心思。有外國研究指出,坐喺張符合人體工學嘅工作櫈度做嘢,生產力比坐普通櫈高 17.8%。揀啱傢俬,做嘢都爽手啲。

工作燈

一支工作燈可以將集中力聚焦喺工作枱上面,唔會俾屋企其他嘢騷擾到。買燈時要留意燈臂設計,試吓活動幅度夠唔夠闊,燈罩會唔會阻到視線。光源最好用 LED,慳番啲電費。
Artemide Tizio LED
售價:$5,500
網址: http://www.artemide.com

茶几

坐坐吓梳化有 idea,第一時間想打入 notebook,最好有一張可以工作用嘅高身茶几,伸手出去就打到字,唔使低身用電腦,喺客廳想隨時開工, no problem!
Ozzio FLAT
售價:$13,650
網址: http://www.ozzio.com

充電器

喺屋企做嘢,電費開支自然大,要慳盡電費,可以揀個太陽能充電器,尤其係可以貼喺窗口兼有儲電功能嘅款式,唔單只吸盡陽光,又可以拎出街當後備電池。支援埋 USB充電就更理想,出街嗰陣用埋街外免費充電站電源,縮數計到盡。
XDDESIGN Window solar charger
售價:$540
網址: http://www.xddesign.eu

iPad架

未必人人想坐定定喺工作枱前面,配個 iPad架,可以 lock實部 iPad,擺喺屋企任何角落;喺廚房煮煮吓餸上網又得,瞓喺床度篤部機亦得,工作地點完全冇限制。
IPEVO Perch iPad Leg
售價:$1,280
網址: http://www.ipevo.com

唔使多講,坐得舒服唔使成日轉姿勢,集中力同工作效率一定高,不過唔係張張櫈都可以符合你體形,特別係 designer chair就更加好睇唔好坐。最好揀由座椅深度到椅背後傾幅度都可以調校嘅款式,扶手可以調校闊度同高度就更理想。
Steelcase Leap
售價:$8,200起
網址: http://www.steelcase.asia

理想咁諗,梗係有獨立書房最好,唔使成日受睡床誘惑。真係冇位整間書房,可以考慮買「合體傢俬」,平時係寫字枱,做完嘢拉高張枱,將背板拉落嚟先會變張床,工作 mode同休息 mode分得開,減少魔鬼誘惑。
Clei Cabrio In
售價:$33,800起
網址: http://www.clei.co.uk

未來視像

對於有自制能力嘅員工嚟講, home office絕對可以提高工作效率,不過,始終都有機會同上司同事開會或見客,要令遙距工作更可行,就有賴科技配合。

AR會議

只要喺個 cam前面拎住指定圖案就搞掂,仲要有埋 3D畫面,個客實滿意。

同上司或客人 sell橋,平鋪直敍好易被 ban,配合 CISCO開發嘅增強實景( Augmented Reality,簡稱 AR)功能系統,只要拎住特定圖案卡紙對住 webcam,就會 key番對應 3D圖像俾對方睇,而且加特效、整色整水話咁易,順便加埋創意分。

四人面談

無論用 Windows、 Mac、 Android定係 iOS,只要裝番支援瀏覽器,就可以跨平台通話。

以前上網速度唔夠快,開視像會議僅僅夠一對一;而家家居寬頻速度閒閒哋都有 100MB,流動上網又有 4G,成 team人一齊開會都掂。其中 Mozilla、 Google同 Opera就搞開放制式 WebRTC( Web Real-Time Communications),主要係將視像會議軟件植入瀏覽器,最多支援四人通話,而且用電腦或手機都得。

隔空握手

放呢隻假手(紅圈)喺屋企,半夜三更都咪話唔驚。

同客人開會,禮貌好緊要,隔住 webcam開會,唔通只可以靠把口同笑容搭夠?好重視禮貌嘅日本人就諗到加隻機械手,俾雙方遙距「握手」,入面仲裝有發熱片同壓力感應器,可以模擬人體溫度同實際握力。不過要特登買隻手嚟握,又好似有啲怪。

保安最重要

Home office最大危機,係容易因為屋企部腦被黑客入侵,再順藤摸瓜攻擊埋公司網絡,導致公司機密同客戶資料外洩。應對方法有二:第一種係每個員工派部只可做公司嘢嘅 notebook,減少員工上網中毒風險;第二種係喺公司伺服器劃出一個虛擬隔離室,俾外勤員工上載文件,經專人掃完毒先擺番入公司網絡,就算上載文件有病毒,都唔會禍及公司。

器材篇
Notebook

即使係 home office,間中都要出街見客或返公司露面,買 notebook做嘢,就要平衡便攜性同功能,畫面靚俾客人睇得舒舒服服就更可以加分。
MacBook Pro 13.3吋 Retina
售價:$11,488
網址: http://www.apple.com

Webcam

唔想因為視像會議畫面鬆朦灰暗,令上司覺得你喺屋企淨係識得瞓,就要揀個高清 webcam,打扮到精神醒目開會,提高印象分。內置喇叭要揀支援 full duplex功能,雙向通話講嘢唔會窒窒吓。
Logitech TV Cam HD
售價:$1,799
網址: http://www.logitech.com

Router

而家樣樣器材都支援 Wi-Fi接駁,唔使駁線咁麻煩,望落都企理啲。揀 Wi-Fi router咁重要,起碼要揀個支援 802.1n制式 router,覆蓋範圍至少有 20米以上,等寬頻訊號可以穿牆過壁,全屋都收到。
Belkin AC900 DB
售價:$1,298
網址: http://www.belkin.com

DC機仔

手機影相功能勁,但如果要影貨辦俾客睇,最好都係揀 DC機仔,配備埋高倍數光學變焦先夠全面,影 product、影 event都唔失禮。
Sony Cyber-Shot DSC-WX300
售價:$2,990(推出日期:四月中)
網址: http://www.sony.com.hk

打印機

雖然好多文件已經電子化,不過間中都有需要打印出嚟,又或者將文件、相片影印成電腦檔案。三合一功能嘅打印機就最方便,打印、 scan同 fax一機搞掂,支援埋雲端打印就更好,隨時隨地都 print到。
Canon PIXMA MX927
售價:$1,988
網址: http://www.canon.com.hk

耳筒

做到攰攰哋,聽首歌輕鬆吓無可厚非,不過夜闌人靜要播首快歌 cheer up自己,都係戴番個耳筒聽好啲。最好支援埋手機免提功能,有來電可以直接收聽。
Philips SHB7000
售價:$699
網址: http://www.philips.com.hk

Tablet

喺辦公室要趕死線,好多人連廁所都唔得閒去。不過, Soho一族買部既輕便,功能又夠強嘅 tablet,就可以拎埋入廁所邊解決生理需要邊工作,都咪話唔 free。
Microsoft Surface Pro
售價: 899美元(約$7,012)
網址: http://www.microsoft.com

外置電

而家啲手機愈出愈快,講緊嘅係耗電量,出街嗰陣上得網多,好易半日玩完,上司或同事搵唔到你就麻煩。買多個外置電最穩陣, iPhone用家要揀內藏電池嘅充電殼,唔使駁俗稱「尿袋」嘅外置電咁麻煩同核突。其他 smartphone用家,買尿袋最好揀電容量高過 3000mAh款式,包保可充滿一次電。
Mophie Juice Pack Helium
售價:$628
網址: http://www.leader.com.hk

外置硬碟

唔想捱咗幾日通頂後份 project一瞬間消失,最緊要定時 backup去外置硬碟,而家外置硬碟容量以 TB計,價錢又唔貴,索性有大買大,順便備份埋電腦內所有檔案,一勞永逸。
LaCie Blade Runner USB 3.0
售價:$2,340
網址: http://www.lacie.com

鍵盤滑鼠

無論喺邊度返工,鍵盤同滑鼠絕對係最大作戰利器,返 office就話公司機冇得揀,自己主場點可以待薄自己?揀隻配合人體工學設計嘅滑鼠同鍵盤,生產力自然 level up。
Logitech K810、 T620
售價:$799(鍵盤)、$529(滑鼠)
網址: http://www.logitech.com

咖啡機

Home office好聽啲就叫做嘢好 free,實情係有開工冇收工。 Time management差,好易做到三更半夜兼通頂。配備一部最新咖啡機(可以微調濃度同有埋打奶功能)就可以隨時醒神補腦,而且得閒歎杯 espresso,開工都開得中產啲。
Nespresso Gran Maestria
售價:$6,388
網址: http://www.nespresso.com

創意留人心

唔打算俾員工喺屋企做嘢,又唔想留住個人但留唔住個心,唔少公司都出盡法寶,打造一個舒適好玩嘅工作環境,提升員工嘅創意同歸屬感,營造「公司是我家」感覺。

◎森林辦公◎ Selgas Cano

環境係好靚,不過夏天蚊多,隨時搞到員工俾蚊咬,邊有心機做嘢。

位於西班牙馬德里嘅建築師樓,特別揀喺森林入面起辦公室,樓高得一層,但一半藏入地底,地面就用落地玻璃,員工企係度 eye level剛剛好睇到森林景,對得多電腦芒,望出去人都醒神啲。不過,開 OT半夜返屋企要穿過森林,都幾得人驚。

◎主題夠多◎ Google

百足咁多爪嘅 Google,一年唔知有幾多瓣創意概念出籠,辦公室自然亦創意十足,就好似啱啱喺以色列開嘅新 office,樓高八層有齊健身室、自助餐餐廳,仲要每間會議室都用唔同主題包裝,搞到好似度假酒店一樣。 Office入面仲有一半空間有落地玻璃,一路做一路望住以色列第二大城市特拉維夫靚景,認真 relax。

Google新 office入面有個自助餐餐廳,窗外仲要有個靚 view,唔講仲以為係酒店。

Google每個 office例牌有滑梯,得閒瀡一瀡,好易瀡出靈感!

每間房都玩唔同主題,好似呢間用花同黑白兩色為主調嘅會客室,唔只員工開心,啲客入到嚟都唔願走。

◎職場遊樂園◎ Davison

講到創意,位於美國賓夕凡尼亞州產品設計公司 Davison一定第一,因為老闆覺得有夢想先有創意,特別將個辦公室搞到好似遊樂場,將船甲板、賽車場、鞋櫳,全部變成辦公室,好玩到爆。

搞到辦公室好似加勒比海海盜場景,員工一定好 buy。

喺賽車跑道中間研究新產品,如果研究緊遙控車,咪可以順便做埋產品測試?

◎電玩植入◎ Three Rings

一個古代風格嘅工作環境做 online game,香港未必有公司諗到。

近年啲 online games都鍾意用古代風格設計遊戲,但估唔到美國遊戲設計公司 Three Rings連 office都玩古代風格。入面除咗有唔同古董傢俬,牆身同傢俬花紋都同遊戲版面嘅外框好夾,等員工更投入遊戲世界。至於桌球室、小酒吧同遊戲區,擁有是常識吧!

◎返工扮 shopping◎ Pixar

如果只係睇相,仲以為係商場多過 office,其實呢度係 Pixar位於美國加州嘅總公司。設計成咁,除咗想員工返工返到好似去 shopping咁輕鬆之外,更因為 Pixar間中會請唔同團體參觀,方便員工隨時拎唔同道具出嚟同小朋友玩,更易掌握小朋友喜惡。

點睇都似 outlet多過辦公室,唔知 Pixar員工係咪女性特別多?

空間夠大,員工先可以同小朋友一齊玩,從中了解佢哋嘅心態。

Facebook

只要在 Facebook以「 NEXT 3.0」為關鍵詞搜尋,或以手機的「 QR code」 app掃描,就可以睇到更多新聞同產品情報。

全景靚裝

香港地商廈寸金尺土,租個 office已經使唔少錢,仲點會有人搞裝修照顧員工?
又唔係喎,正所謂大有大搞細有細砌,搵嚟香港幾間靚裝大中小企,用全景相影低環境到底有幾靚,記住搣出嚟貼喺 office當眼處,用酸葡萄心態鼓勵自己發憤轉工之餘,老闆都唔好意思成日走嚟話你。

Substance◎設計公司◎

法國籍老闆對中式傢具情有獨鍾,唔單只擺滿成個 office,連燈光都鬼咁有 mood,開 OT都制啦。

位於舊式唐樓地鋪,成個門口
種滿植物,極有外國 feel。

TBWA◎廣告公司◎

上年全公司翻新,將 bar枱搬埋出 reception隔籬,內藏四個雪櫃仔,擺滿啤酒香檳小食,俾員工客戶任飲任食。

全落地玻璃對住綠油油山頭,傾嘢都零舍有靈感。

Dragon Concept◎手袋製造◎

會議室做埋 show room,最正係有條似足天橋設計嘅走廊,拎住個袋行番轉,生意都易傾啲。

俾大量手袋包圍住,相信好多女士都夢寐以求。

SOHO◎金融業◎

豪花近百萬裝修,大大張梳化兼且仲有個露台,可以得閒 BBQ,何止 dream office,直情係 dream house。

電動摺合式睡床,隨時可以瞓番轉再搏殺。

text:科技組
photo:攝影組

壹週刊 - 1202 - NEXT 3.0 工作•家

没有评论:

发表评论