名氣生活
鄧永鏘 估佢唔到
周星馳的電影經常有趣怪發明，以為是手提電話其實是鬚刨，外表似鬚刨的物件又原來是風筒。其實社交界中亦有個創意十足的鄧永鏘，最近他和劉嘉玲合夥投資數千萬，在灣仔開生活品牌 Tang Tang Tang Tang，店內有些貨品亦相當搞笑，一個看似夾萬的方形盒怎估到是電飯煲？普通一個座枱鐘改名叫 Spy Clock，想來想去都唔知點解是一個密探鐘，原來座枱鐘有拍攝及錄影功能，鄧永鏘也笑着說：「呢間鋪頭唔係普通鋪頭，係好得意，普通零售無意思，要設計到知內容時會笑咪咪，這個好緊要。」
- 鄧永鏘 估佢唔到
全方位
這間位於灣仔莊士敦道的三千多呎地鋪名叫「 Tang Tang Tang Tang鄧鄧鄧鄧」，和貝多芬第五號交響曲同音，鄧永鏘不怕醜當着客人面前邊哼着交響曲邊說：「叫人記住，我諗人人都識。」選在這裡開鋪，而不是尖沙咀及銅鑼灣等自由行旺區，是貪這裡樓底高，「要樓面高舊樓先有。」
高樓底下，鄧永鏘花心思把店鋪當家居劃分成客廳、飯廳、寢室區、浴室等不同區域，同時也把他的古董傢俬或壁爐一併放進店內，營造大宅門品味與人分享，吸引廿五至三十五歲的目標客戶，「好多人夢想點樣整到自己間屋咁靚，係全部可以有這可能性。」就連睡衣店內也有售，貫徹家品店風格，「呢度係屋企，你要乜我哋俾乜。」
店內的產品，驟眼看以為普通貨色，查實他把幽默和實用性融入產品，譬如店內的方形電飯煲，靈感來自開放式廚房，「以前煮飯喺廚房裡邊好臭㗎嘛，但現在好多人睇到美國片好多係 open kitchen， open kitchen整 National點得，所以電飯煲整靚啲。」鄧永鏘捉心理說：「開鋪頭最緊要賣嘅嘢比較先進啲，依家唔愛老，要愛新。」去到浴室區，還有一個可用來照鏡，又同時是時鐘及可用來磅重的產品，「如果你係減肥，又一路去遊埠時，一定要有同一個磅才知有冇瘦到，有個 function喺度，買其他啲無咁細，拎唔到走。」
鄧永鏘最想令中國人感受到我們完全可以追到西方，「唔使用咁多錢買西方名牌，我哋中國人有咁嘅本事和雄心做好多嘢。」其實鄧永鏘在九四年以過億開上海灘，今日重做零售，他坦言租金貴了，亦面對着網購衝擊，但他滿有信心說：「依家好多人買嘢係咁㩒係咁㩒，我覺得整整吓會悶，一定要出嚟買嘢，我唔鍾意上網買嘢，唔知嚟到會否貨不對辦？嚟到呢度我俾到你唔係一個普通感覺。」為了有新鮮感，他們每月或每兩星期會有新產品，「等你哋有驚奇發現，呢個好緊要。」
上月中開幕時，請來鄧永鏘好友、國際超模 Kate Moss及梁朝偉來剪綵。
女兒鄧愛嘉和兒子鄧裕鏗開幕日到場撐老豆，鄧愛嘉笑言和爸爸合作有歸屬感，但同時又有不便：「食飯時成日傾公事。」
訪問當日，老闆娘劉嘉玲突然出現，鄧永鏘笑笑口說：「佢日日管住我。」劉嘉玲亦笑話：「係呀，睇吓啲數。」最後嘉玲買了多個由鄧永鏘購入的黃色英國玻璃花樽。
店內有寢室區，讓人參考再打造自己的品味家居。
鄧永鏘把黃色盒拆件，原來是個八百元電飯煲。
近視老花啱用的 Adjustable Glasses售價五百元。
六百元的 Spy Clock，放在枱上，可神不知鬼不覺地錄影。
客廳以壁爐配中國對聯，大玩中西合璧，鏡牆是新式的柳樹圖案，配合鄧永鏘要革新的思想。
我話事
下一站他會打入英國市場，之後再入中國，有劉嘉玲做老闆娘亦有利打進國內，「劉嘉玲是中國一個咁大明星，希望佢同我哋加加油，做我哋 ambassador。」他與劉嘉玲如何分工？「設計我做晒，我亦尊重佢意見，因為佢係 shopping皇后。」但最終話事咪又係鄧永鏘？「如果兩個人話事好麻煩，最後我話事。」
鄧永鏘期望五年後可能把公司上市，「但唔容易，你要日日、個個星期有新產品，產品可以賣得到 75%，否則 figure完全錯晒。」產品好之餘，鄧永鏘亦注重服務，他不介意幫 Giordano賣廣告說：「佢哋啲人好叻，好佩服佢哋。」
他的女兒鄧愛嘉是公司的 creative director，負責設計，鄧永鏘自言想女兒繼承他的事業，兒子鄧裕鏗則繼續向外闖，「男仔應該出去同其他公司學嘢，既然佢鍾意畫又了解全世界的名畫，而 Christie's（拍賣行）係好公司，所以唔會監佢嚟同我做嘢，五、六年後佢鍾意做乜就做乜！」
他拎住八百元的 Bluetooth Speaker笑說：「去遊埠沖涼時有嘢聽。」
浴室也陳設得一絲不苟，他話：「我諗無人整到自己沖涼房咁靚。」
店內有個「姣斯躉篤」牌匾，鄧愛嘉說這是父親的金句。
鋪內放了不少鄧永鏘的古董收藏，包括這座古董收音機壁爐。
他把與教宗的合照放店內做裝飾。
一到鋪頭，他忍不住出手把產品排得更好。
没有评论:
发表评论