《我是歌手2》G.E.M.墊底谷內地星
G.E.M.張宇墊內地星底《我是歌手2》掀是非
內地湖南衛視節目《我是歌手》首季去年推出，重金邀請兩岸三地紅歌手參賽令收視爆燈，節目賺大錢之餘亦是非多多，因台灣猛人如林志炫、楊宗緯等都敗給內地組合羽泉手上，而前晚播映的第二季，香港的鄧紫棋（G.E.M.）、大馬的曹格及台灣的張宇，名次同樣排在內地歌手之後，難怪節目被指借港台歌手抬高內地歌手身價。
內地唱歌比賽節目《我是歌手》第二季前晚首播，「香港小巨肺」鄧紫棋力戰一眾前輩級，包括台灣的張宇、大馬的曹格及內地的韓磊、韋唯、羅琦和周筆暢，一身白色貼身短裙的G.E.M.以《泡沫》參賽，九十後的她對內地觀眾而言十分陌生，但她的表現令觀眾讚嘆，賽後其微博粉絲亦急增過萬，粉絲留言大讚她又靚又唱得好，即時令她在內地一夜爆紅。
No.5 G.E.M.
■G.E.M.前晚在內地唱歌比賽《我是歌手2》只得第5名，被指遭利用陪襯內地參賽歌手。互聯網圖片
傳聘職業觀眾撐場
未有內地市場的G.E.M.踏出成功一步，但賽果未算最好，最終獲得第五名，而頭三名均是內地歌手，第一名是內地大叔輩歌手韓磊，第二名是有「中國Whitney Houston」之稱的韋唯，第三名為「中國搖滾第一女聲」羅琦，海外幫的曹格得梗頸四，G.E.M.以一票之差排第五，曾任《超級星光大道》評判的台灣幫張宇竟然僅得第六名，周筆暢則包尾。
No.1 韓磊
■前晚《我是歌手2》三甲均是內地歌手，第二名的韋唯更被網民批評唱得差。
No.2 韋唯
No.3 羅琦
No.4 曹格
■大馬歌手曹格以一票之差，壓住G.E.M.排在第4位。
No.6 張宇
■兼做主持的台灣唱家班張宇，僅得第6名。
今季的賽制有別上季，將不設復活賽，每位歌手會累積兩期的評分再分高下，最低分的一位將被淘汰，冇得留低。而評判方面，同是由現場500位觀眾主宰歌手生死，500位全是來自內地各省市的觀眾，明顯對內地參賽者較熟識及有感情，海外幫必定輸蝕。
其實上季已有指部份觀眾為職業觀眾，喊住出鏡的可獲700元人民幣報酬，所以香港的黃貫中首圈出局，台灣猛人楊宗緯和林志炫最終亦意外敗在內地組合羽泉手上，事後台灣傳媒將此事政治化討論一番。賽果惹起爭議，亦被指搵外地歌手墊底，以抬高內地歌手的身價。
香港觀眾最關心的，自然是G.E.M.有冇得繼續留低，對於自己前晚的表現，G.E.M.昨日說：「好開心呀！我賽前都預自己第五，真係第五，鬆一口氣，因為現場觀眾投票，驚佢哋唔識我，第七咁點算呀？有啲擔心，第五已經好開心，覺得自己表現幾好唔太緊張，發揮到正常水準。」
問到是否因為出騷價高，可不太計較成績？G.E.M.坦言：「應該掉轉講，我係不計成本做呢個節目，我喺內地唔係知名度高，去係抱有機會已算係咁嘅心態，要珍惜機會，即使回報唔夠之後表演上嘅花費，都唔會計較，我仲有好多嘢預備嚟緊幾集做。」對於由內地觀眾評選，有偏幫內地歌手之嫌，G.E.M.說：「唔會嘅，觀眾分年齡段，五十後、六十後、七十後、八十後同九十後各有100人，每個年齡層都有，有時比賽唔係睇唱功、表現，係睇帶唔帶動到氣氛，同觀眾嘅互動有冇至係最重要，攞頭三名嘅係好叻同觀眾互動，自己係服嘅。」
■G.E.M.以輕鬆心情，跟六位前輩級歌手比拼。
■現場觀眾睇得投入，更有指如果觀眾喊住出鏡，可得700元酬勞。
No.2韋唯被批唱得差
第一晚比賽播出後，為G.E.M.在微博激增過萬粉絲，她笑言：「好開心，但亦提醒自己唔好花太多時間睇評語，而唔記得準備比賽，要適當調整自己嘅心。」
對於七位參賽者各有支持，網民「不哭不鬧小Long玲」留言：「一直喜歡周筆暢，但鄧紫棋的《泡沫》瞬間吸引了我。」「東山一葉」則彈韋唯：「韋唯唱得最差，怎麼排第二的？」而網民「馨馨小胖」則說：「不精采，老將其實仔細聽感覺嗓子已經廢了，比較期待新生代。」
採訪：朱小寶、皓騫
周筆暢包尾
■周筆暢雖然包尾，但仍獲不少忠實粉絲打氣。
没有评论:
发表评论