ILIKE
睇相搵食
約朋友食飯，好多人都習慣咗用 OpenRice搵食店，不過，有時真係連食邊種菜都冇諗頭，開住個 app都有啲無從入手。最近裝咗飲食版 Instagram手機 app「 OpenSnap」，雖然搵食功能冇 OpenRice咁多，但我就反而覺得簡簡單單仲好用，其中最好用嘅功能係可以直接睇其他人影嘅食物相，睇住嚟諗食乜，真係容易好多。而且 app入面又有其他亞洲國家嘅飲食資料，去旅行嗰陣，就可以用佢嘅「附近」定位功能，睇吓嗰區有乜好嘢食啦。
周群雄
荷李活遊戲
我幾鍾意睇影帝 Kevin Spacey做戲，上星期佢又有「新戲」上，不過呢套戲唔會喺戲院上映，只可以喺你屋企部 Xbox One度睇。點解？因為呢套係新一集《 Call of Duty》遊戲嘅 trailer！遊戲 trailer搵一線明星做宣傳唔係新奇事，但係以前多數係「聲演」，好似 Kevin Spacey咁出埋鏡就比較少見。故事劇情話佢係一間僱傭兵公司嘅老闆，想用一己之力隊冧美國政府……講到咁勁，但好唔好玩就要等佢十一月出街先知。
潘健文
電影畫面係咁加動畫，有時入戲院睇戲以為自己打緊機，點知遊戲畫面反而掉番轉用真人，估佢唔到！
父親有禮
仲有一個月就父親節，頭痛緊送乜好。咁啱喺旺角腦場睇到部 7吋 phablet ASK 792SP， 1920× 1200解像度 IPS屏幕真係好靚，最啱有老花嘅老豆用。硬件亦好強：八核心處理器、雙卡雙待、 1300萬像素相機，加上 2GB RAM同 16GB容量，雖然老豆未必用得盡，但起碼唔怕佢睇高清片嗰陣行得太慢，用到火滾先。
部機雖然 Made in China，不過有以上賣點，而且嚿充電池都幾襟用，用嚟上網、打機睇片都應該頂到一日，街價亦只係賣二千五蚊左右，相信送俾老豆，都唔會詐型啩。
機身只厚 6mm同埋得 280g，算輕巧。試過用安兔兔跑分，差唔多有 28000分，勁過 Samsung GALAXY S4同埋 HTC One。
林勇
第 N隻 G-Shock
十九幾年前，買第一隻 G-Shock，喺鵝頸橋隔籬，一間叫做「東京」嘅鋪頭，二百幾蚊。當年覺得 G-Shock好好玩，藍燈，響鬧，計時，倒數計時，襟跌襟撞。十九幾年後，我仍然覺得 G-Shock好好玩，太陽能，電波校正，同樣有響鬧計時倒數計時，同樣襟跌襟撞，再者，仲有埋指南針溫度計高度計氣壓計，你以為我搞亂 Pro Trek同 G-Shock？ No la，我第 N隻 G-Shock叫做 Rangeman，屬於 Master of G系列，黑面版！
更重要係，有朋友去開日本，一個 WhatsApp，即時入手，平過香港！
好鬼大隻，乜鬼功能都有咁滯，至於個樣，好主觀嘅，我好受囉！
劉定邦
text：科技組
没有评论:
发表评论