昨日講世界盃賭波及假波調查，英美記者近年都報導過在星加坡與馬來西亞有龐大集團，意圖操控一啲國際賽事，特別係英超球賽。
估唔到以財經新聞資訊聞名嘅彭博通訊社對賭波新聞亦有調查報導，令左丁山第一次知道世界上有賭波賭博經紀（Bet Brokerage），經營方法就似股票市場嘅套戥專門店（Arbitrage House），而世界上最大一間賭波經紀行就係由香港人創辦與經營嘅「三和Samvo」，呢間公司設於倫敦城中區嘅一座不起眼辦公寫字樓大廈，公司內裝置最新、最先進電腦交易及報價系統，與一間股票經紀行冇乜分別，最大分別就係公司內男男女女用Skype透過電腦與全球客戶對話，廣東話橫飛，公司主席叫做Frank Chan，今年約43歲，曾入讀英國寄宿學校，曼徹斯特大學畢業，有布里斯托大學管理碩士學位及法國Ecole des Ponts ParisTech嘅經濟學碩士學位。有咁嘅教育背景，多數係做投資銀行家嘅，冇錯嘞，呢位陳先生在上世紀九十年代在百富勤工作，跟隨梁伯韜搞紅籌股上市，後來轉去京華三一（Core Pacific - Yamaichi International）。到咗2003年，經濟不景，生意不前，陳先生去咗倫敦小住，發覺當地賭波生意蓬勃，但著名博彩公司開出嘅賠率，各有不同，例如佢熟悉嘅曼聯對賽，曼聯嘅贏波賠率就有高有低，佢要每日打好多個電話周圍去搵最高嘅曼聯贏波賠率嚟落注，於是靈機一觸，用番佢曾祖父一百年前用嘅公司名（三和），經營賭波經紀生意，香港人在倫敦開賭波公司，睇起嚟似乎冇競爭優勢，但原來佢爸爸Peter在60年代在九龍橫巷收馬纜，後來做澳門賭場叠碼仔，故此佢有啲亞洲網絡，而不可不知嘅係，今天賭波係亞洲人天下，「三和」倫敦總部每日與星加坡、金邊、台北、永珍、胡志明市、耶加達、馬尼拉嘅賭客聯絡，平均注碼係每注二萬五千英鎊，不少注碼大過一百萬鎊，三和每日收賭注，再轉發予各博彩公司賺些微賠率差額，有時（根據三和嘅電腦程式估計賽果），索性自己受注，與人客對賭。三和一個星期嘅總注碼，據彭博估計，大過美國內華達州全年體育賭注！三和嘅CEO，Yan Tang女士（現已離職）只有31歲，有兩名細路，LSE畢業，主修經濟與數學，真可謂英雄出少年咯。
华海。華海。
没有评论:
发表评论