朋友Y賞面請食飯，到佢嘅山頂大宅同其他熟朋友傾吓偈喎。山頂大宅好多時就係屋夠大，但因出入道路狹窄、常遇斜坡、停車位少，主人一話請客啫，客人就最好唔好揸車上去，弊在左丁山冇司機呢，唔同其他客人喎，好彩，賓客之中，有大公關華德在，佢話坐公司車上去，歡迎左丁山搭順風車往返中環，咁就掂晒，因為雖可以坐的士上山頂大宅，但回程之時，就幾唔方便㗎。
朋友Y在大花園草地揸住杯香檳歡迎我地，成班人可以遙望維多利亞港燦爛夜景，又適逢是晚天朗氣清，一望無際，只見IFC、ICC隔海互相輝映，正是「春有百花秋有月，夏有涼風冬有雪，若無閒事掛心頭，便是人間好時節」，一杯在手，就想起李白獨酌無相親，舉杯邀明月，對影成三人，我等則享受人間好時節，可以行樂及時，快慰何如。
飲飲吓，A女士話有好多蚊咬，要返回客廳，左丁山就唔覺得有蚊喎，因為每有其他人站在身旁，啲蚊例必咬他人不咬左丁山嘅。但見A女士要搵蚊怕水，當然全部撤退返回飯廳內享受晚餐。Y夫人係著名商界女強人，手下成千上萬，但在家請客食飯就親自斟茶遞酒捧餐，出入廚房指揮三位女傭煮菜，客氣到極，我地真係過意唔去，要向佢沙冧，再三拜謝至得。
一路食Y夫人一路勸酒，日本18年、21年威士忌原來好鬼正，可惜今人規矩多多，法令繁苛，那敢如辛棄疾般，「汝說劉伶，古今達者，醉後何妨死便埋」（沁園春，其實是掙扎戒酒之詞），只好飲一啖半啖即止。
朋友Y係財技高手，坐在佢身邊，唔講錢唔似樣，佢話在廳外大草地下望，有四座獨立屋，叫價十萬元一呎，左丁山笑云：「比較一下，你間屋咪要起碼二十萬元一呎？加列山道有大屋賣，講到要17萬元一呎噃！」朋友Y話：「賣咗就買唔番嘅嘞！」山頂大宅物以罕為貴，不可視作為一般住宅，但係貴成咁，是否物有所值，亦是疑問。次日係星期六，FT例牌有廣告特刊House & Home，內有不少歐洲大宅出售廣告，法國康城一間花園游泳池別墅，屋內342平方米，佔地2357平方米，有海景，售360萬歐元；洛杉磯比華利山一間西班牙式大屋附設家傭宿舍、訪客住屋、游泳池等，只售7百萬美元，奧地利Salzburg一萬呎別墅，豪華歐洲式金碧輝煌裝修，售8百萬歐元，與香港豪宅價相比，還未入流，恨死香港人咯。
HH
没有评论:
发表评论