油價博弈 - 左丁山
油價在國際市場毫無支持力，不斷下滑，會跌到幾低，天曉得。最大、最低成本產油國沙特阿拉伯嘅石油部長接受金融時報訪問，好坦白咁講：「OPEC（石油國生產組織）不會減產，我地一定要維持目前市場（能源市場）佔有率，油價每桶係60、50、20美元，無關宏旨。」講得咁坦白，與以前堅決維持固定油價嘅OPEC立場，完全不同，為何如此，唔駛畫公仔畫出腸，就係要與美國頁岩氣爭市場，務必利用低油價嚟一鋪打殘生產成本比較高嘅頁岩氣及另類能源吖嘛。油價跌到四十幾美元一桶嘅話，絕大多數美國頁岩氣須要停產，否則破產，搞甚麼風力發電、核電、水壩發電、太陽能發電，就更需要大規模國家公帑津貼，綜合成本高到納稅人與最後用家怨聲四起。
油價已變成一場歷史上空前未有嘅經濟博弈，理想家梗係話要為長遠着想，堅持發展昂貴的另類再生能源，阻止氣候變化。務實主義者就會問，有平油唔用而轉用更昂貴嘅新能源，短期內何來經濟競爭力？就係咁，電動車製造商Tesla股價大跌，因駕車人士有低廉汽油可用之時，點解要買比較貴嘅新環保車？沙特阿拉伯睇通呢一點，故此決心喺油價上玩一鋪勁嘅。
既然如此，啲石油支援服務股（如鑽油、磡探海洋石油嘅設備供應商）嘅股票大可不理，石油股、環保能源概念股短期內可避則避。貨幣方面，回歸美元、港幣，至於要買甚麼股票，就好傷腦筋，搵啲專家問清楚先。前些時，有人問左丁山：「大手買入國泰好唔好！」理論上係好嘅，油價大跌，仲唔益航空股？國泰又好生意到極㖭。但國泰素來有油價對沖，不知對沖價如何噃，如在100美元一桶時已預先買定對沖，依家咪蝕到喊？呢呢，12月19日就有報導，一向做事謹慎做好對沖嘅國泰就好唔好彩咯，國泰在80美元一桶時已向投資者透露，燃油對沖勁蝕4至5億元，依家跌到60美元一桶，豈非蝕得更多？發盈警未必無可能。一啲消息人士話，中國三間上市航空公司國航、東航、南航，就素來膽博膽，買現貨油（Spot），甚少對沖嘅，故此呢次油價大跌，苦了管理謹慎嘅國泰，但明益中國沙膽「三航」！在現實世界，做乖仔可能係被懲罰嘅一個，書本上冇得教，故此管理係一門藝術，唔係科學呢。
I
没有评论:
发表评论