【短片】【香港做Freelancer冇運行】 得獎插畫家：過咗幾年食屎生活
2016-09-07 13:00:00 HKT
講起插畫家生存空間，佢好認真咁話係好難
為咗証明讀動畫搵到食，Johnee變返自由身freelance
兩分幾鐘畫一個食字人物
右邊嗰位羊孫仔，即係孫楊，the new world呢！
筆下人物Galaman，一舉起胳肋底就會變超人
《Galaman》參加過好多電影展
Johnee喺網上好有自信咁自稱「氣質男」
如果你仲認為自由工作者（Freelancer）等如不務正業同游手好閒，不如你睇吓插畫家兼動畫師Johnee Lau嘅故仔啦！Johnee 讀大學時修讀數碼媒體，創作咗搞笑動畫英雄「Galaman」，得到大大小小動畫獎項，睇落前途無限好，於是佢諗住可以接相關藝術工作維生，點知畢業後先知畫畫唔可以當飯食：「我嘅收入只係夠維持我嘅生命，幾年冇買過一件衫，冇出街睇過一場戲，過咗好幾年食屎生活。」Johnee話，畢業後呢幾年雖然都有唔少品牌搵佢合作，畫poster，甚至搞展覽，但始終 freelancer係一個被動角色，永遠唔知道對方幾時搵你，幾時唔搵。
記者：譚倩宜、黃芷蔚 攝影：馮峰、Neo
佢不時會喺網上放上自創動畫供大家免費收睇，動畫由自己一手一腳製作，當中包辦劇本、配音同主題曲。但免費上載作品嘅Johnee，反而畀同行睇唔起，「有個前輩同我講，『作為一個納稅人，如果我知道政府有咁多錢，畀你呢啲網上有免費睇作品嘅創作人嘅話，我會覺得好唔gur囉！』政府如果有筆錢想幫助一啲香港創作人，唔係就係應該畀我呢啲冇錢都願意繼續做嘅戇ｘ仔咩？」佢直言當時對呢個行業已經冇信心，轉咗去專上學院教動畫，但因乜事依家又會回復 freelancer身份同我哋傾計呢？「最大轉捩點係，學生開始問我：『香港做呢一行搵唔搵到食？』嗰一刻其實我唔知點答佢，我自己都係一個逃兵。」為咗証明讀動畫搵到食，Johnee就重投自由工作者行列喇！問佢依家搵到幾多錢，佢好老實咁話：「半年靠接freelance收入有15萬，大槪一個打工仔人工。」
依家Johnee每晚都堅持喺專頁開live，幫觀眾畫「Faster Piece」，即係觀眾畀個名詞出嚟，佢用兩至五分鐘時間即場畫，晚晚都有幾千人睇，邊個話免費藝術唔值得尊重？
I
没有评论:
发表评论