姚梁游難捨議席 - 左丁山
上星期三睇電視直播立法會議員宣誓就任儀式，事先諗住啲新科激進派年輕議員會玩嘢以示抗議整個政治制度，但想唔到梁頌恆與游蕙禎會玩得咁癲，不止講「支那」，游小姐仲講埋fxxx。大學教授身份嘅姚松炎叫做斯文啲，但在誓詞加料，亦被拒絕。
玩嘢祖師梁國雄最識得玩到臨界點就適可而止，既可充份表達意識之不滿、抗議之憤慨、又不會令「執法者」（如立法會曾鈺成、街頭警察）太過難以下台，故此啲警察指揮官好鍾意梁國雄㗎，知道長毛心中有個劇本吖嘛。商人R有一次搞公共活動，想不到事先張揚帶人嚟示威，商人R慌忙報警求助，警官聽到係長毛之後就同商人Ｒ講：「得嘞得嘞，唔使咁驚。」不過時至2016，梁國雄已經垂垂老矣，年輕議員視之為老坑，已經係落後一族。新人類示威就無路可捉，令執法者摸不着頭腦，行事唯有用對應maximum risk嘅態度處理，雙方產生大衝突嘅可能性明顯增加。
2016年新選出嘅立法會開始第一天，就玩出大龍鳳，以後四年都唔知點捱，如果係梁振英連任特首嘅話，佢到立法會出席答問大會，游議員會唔會對佢ff連聲，貽笑國際？有呢啲事發生嘅話，CNN、BBC及新加坡電視台相信以後都會派攝影記者長駐香港立法會。講番轉頭，游梁姚三位今日要再次宣誓就任噃，會唔會又玩嘢玩到不能上任呢？2012年黃毓民宣誓時，第一次不被接納，隔一個星期就乖乖地補番，相信今日游蕙禎、梁頌恆、姚松炎亦會如是。點解咁肯定？好簡單啫，第一點考慮係政治，如果三人真係搞到自己冇議員做，對泛民陣線製造大傷害，等於向建制派送大禮，從政者如果笨成咁，就冇資格從政咯；第二點係市儈啲講銀紙，立法會議員月薪93040元，姚松炎或者唔恨，梁游兩位可能未見過如此高薪，為咗玩嘢得一時之快而放棄93040元乘48個月再加15%約滿酬金，相當於總數5百餘萬，會唔會肉赤啲呀？若果真的視錢財如糞土，四年後值得大家再投佢地一票。
議會有議會之規章與約定俗成，未競選前已經知道，覺得呢啲規章唔公道，唔公正，入咗議會之後要搞改革，要踢走一啲舊式方法，咪試吓去做囉，問題係用乜嘢方法，而不滿人士自己又有甚麼新方法拿出來以代替舊的一套，新科議員一定識得向舊制度搗蛋，但搗蛋之外有乜識見，尚有待觀察。
上一則: 英鎊跌到幾時 - 陶傑
下一則: 學鋼琴已不夠格，要豎琴才像樣 - 林夕
Z88
没有评论:
发表评论