【實試惡店】跑馬地最惡粥麵店 老闆娘 ：客人對我又愛又恨
傳說，跑馬地有一個惡女人，蓮園粥粉麵老闆娘陳麗霞。她以惡聞名，但卻奇在店有很多名人捧場客，熟客有前財政司梁錦松、四太梁安琪，演藝界有徐小鳳、郭富城等等。店在跑馬地已有30年歷史，招牌有炸兩、黃沙豬潤粥，我們決定放蛇實試。
蓮園粥粉麵老闆娘陳麗霞，以惡聞名，被封為跑馬地最惡的老闆娘。
平日下午三時，跑馬地很寧靜，蓮園亦是，只有兩三枱客。霞姐很易認，個子不高，蓄着一頭捲髮，短衫短褲，說話中氣十足。餐廳有兩個餐牌，甜品及粥麵，記者隨手拿錯甜品，霞姐提醒：「要咩！呢個係甜品餐牌，你要粥麵，係咪？」記者思考良久，她亦無催促，但說話倒是精警，唸唸有詞說，「你揀定自己想吃咩先？我唔係你心目中嗰條蟲，你諗清楚先好講。」我問她，炸兩份量多不多。「你可以叫個炸一，小姐！炸兩得一個份量，我哋有限量，不如你先點個炸一，不夠先加其他東西，好唔好？」她聲線開始提高。我再問，粥有無葱？有無芫荽？她說，「你要定不要？我無芫荽，人唔夠聰明便唔放入去。」落完單後，她說，「$220啊！」我問，要先付錢嗎？「唔係同你講嘢，你唔好搭錯線，唔好搭訕。」
席間，電話響起，霞姐拿起聽筒，靜聽三四秒，突然爆發，「黃小姐，你說吧！唔好玩嘢，我化了灰都記得你。」那一刻，我亦緊張起來，以為是哪家的尋仇電話，原來只是一個普通的熟客外賣電話，我無誇張形容，再隔三四秒，她便說，「齋腸呢？好啦！ 現在來。」我們茶壺要加水，她不用數秒已遞上新裝滿水的茶壺，「你叫熱茶都知你想點！我好聰明，聽到你叫茶，我不會特登返轉頭行兩次。」唉呀！你不會又要再洗多個茶壺嗎？「你諗多咗！你唔飲我就唔使洗，你都戇居！唔好諗人，最緊要諗自己先，有需要就要講。」
坐了大半天，我鼓起勇氣邀請她做訪問，無料到她竟爽快答應。她直腸直肚說，「問咩！講啦！其實我可以唔答你，但見你坐咗咁耐，依家又咁啱無咩客人，就答你幾條問題啦！快！」客人有無投訴過你好惡？為甚麼你咁惡？我單刀直入。「客人愛死我，對我又愛又恨，愛，係因為食物好味，恨，係因為我夠串嘴。但我就算係咁串嘴，一樣大把生意，因為你嘅嘢真係食得，呢個價錢喺跑馬地唔愁無生意做，問題係我做唔做！」她霸氣地說。那為甚麼要經常鬧客？「好多客人每日問好多白癡問題，豬潤粥有幾大碗？炸兩有幾多？日日都有人問，好怪。唔會有人一入嚟就話，我要咩我要咩，爽快啲啦！」她認真地說，「你覺得我串嘴，其實我講嘅嘢不知幾正常，一個65歲的女人喺餐廳每日捱十幾小時，返早上八點放凌晨兩點，唔係為錢，唔係為興趣，我有孫有仔女，唔怕無人養，但我仍有能力工作都繼續做。」她續說：「好多人話你呢個年紀返去湊孫，去公園玩啦！我唔係呢種類型，我仲係夜蒲既女人，我夜生活咗幾十年，同朋友飲兩杯，我唔會因為呢份工要我七點就上床瞓覺，咁樣我會早死！」又說，「我呢個年紀贏咗好多人，兩蚊搭車，呢個年紀仲着短衫短褲，你睇下你哋着得幾臃腫！」
由於長期請不到人，樓面只有她一個人，她說自己脾氣不好，一忙就「忟憎」。「我一對手已經又洗碗又倒茶又遞水又落單，你哋走咗，幾叠碗又要在裏面洗，我時薪100蚊都請唔到人洗碗，嬲嬲地就自己洗，無話無咗邊個唔得！」她又說，「我要顧着出品，出品始終要靠師傅，我一個女人帶着四個廚房佬，單係師傅人工，已經過十萬元一個月，皮費好重。」說罷，她帶我入廚房，並說，「你隨便影！你影下啲碗，我咁嘅身家都要洗大餅，我點解咁串嘴，我唔係唔使做，呢個世界有付出先有成功，錢唔會丟下來讓你去執，呢個世界無不勞而獲。」
訪問期間，有一圍是熟客，「客人喜歡畀佢鬧（霞姐），如果唔係都不會嚟食，有啲人唔被人鬧會唔開心。」那你喜不喜歡她鬧你？「佢又未鬧過我，最多串我，呢度炸兩、麵、 河粉整體都幾好。佢嘅人其實幾好，夠真性情！」霞姐主動問他們的檸檬茶用不用添茶，是免費的。「呢個時間得閒，繁忙時間鬼有空理，得我一個人做咋！」
霞姐現有兩間舖，分別是甜品店及粥麵店，由於兩間店相鄰，座位共用，食物亦可以共享 。「我有想過唔做，無想過搬出去跑馬地做。如果煮東西唔好吃不如唔好做，依家大部份都係垃圾，呢度係跑馬地，唔係油麻地唔係旺角，要分下地段，食物要有一定水準，唔好經常拎深圳同香港比，係有分別！」
蓮園粥粉麵
跑馬地成和道51A地下D舖
記者：何嘉茵
攝影：鄧鴻欣
2017果籽繼續認真知味。識買惜用。行以求知。好事多為。重修舊好。
緊貼果籽報道，即like： http://fb.me/AS.AppleDaily
炸一腸粉，最聞名是炸兩，很新鮮。$22
店有很多名人捧場客，熟客有前財政司梁錦松、四太梁安琪，演藝界有徐小鳳、郭富城等等。
蓮園粥粉麵
Z88
没有评论:
发表评论