越南美食 - 左丁山
呢日注定有食神。中午冇約會，自己一個人去金華燒臘食燒肉叉燒湯米，食完就例牌行街吸收維他命D，醫生話可以食維他命丸嘅，不過曬太陽係最自然吸收維他命D嘅方法。去邊度行街曬太陽最舒服呢？肯定就係中環中心地下嘅廣場啦，嗰度下午時分，太陽曬到正，陽光充足，兼且廣場夠濶大，離開馬路，十分平坦，行得舒服，花二十分鐘在廣場兜圈，係午飯後上佳運動。
行行吓在吸煙區外邊緣見到賓架C與賀賓T正在吸煙，自得其樂。講開又講，整個中環的商業大廈外都有白領階級，不分男女，企在街上吸煙，日灑雨淋未必好舒服，但中環中心就唔同，在地下機利文街嗰邊有一大塊四面通風，不見太陽嘅吸煙區，有盆栽與外邊隔開，內有圓枱、座椅，不時涼風陣陣，好多白領買杯咖啡，在此坐下吸煙打牙骹，遠勝站在大廈門口打邊爐；難怪不少在中環中心返工嘅人士都話中環中心呢度係中環最佳戶外吸煙地方。
左丁山素來唔食煙，同佢地傾咗五分鐘就無謂互相阻住啦，拜拜而去。點知就因為呢五分鐘，預約都冇咁準，行出大馬路啫，就咁啱碰到大賓架R經過，俾佢喝住。賓架R呢日穿着好樸素，如果唔識佢，點都唔會知佢係大班級人馬。賓架R話，「啱嘞，今晚我包咗砵典咋街嘅Brass Spoon，七點到九點，請一班同事食越南牛肉湯河兼飲番幾杯，你得閒就嚟啦。」嘩，有口福咯，每日中午時分，呢間Brass Spoon門口排晒長龍，晚上七時就閉門休息，呢晚居然肯破格俾賓架R包廳，可見賓架R面子十足，左丁山立即話，「唔駛排隊有好嘢食，卻之不恭也。」於是準時七點去到門口，賓架R與良人一齊到達，還有證券界（已退休）高人米高攞住麥卡林威士忌行入嚟，入到Brass Spoon，只見銀行高層雲集，非執董、財務總監、環球銀行業務主管、零售銀行主管、私人銀行阿頭、公關部老總等等全部齊晒，還有退休咗嘅新亞師妹、前中國區總裁D，認真熱鬧。賓架R與各同事打成一片，親和力十足，做行政總裁，總不能板起塊面發施號令嘅，如賓架R咁，和藹可親平易近人，適當時候與同事一齊飲酒食河粉，大家都容易在工作上走多幾步啦。呢晚全場任食任叫，紅酒香檳麥卡林威士忌任飲，都唔理得邊位去埋單找數咯，左丁山未試過食咁多款越南食品嘅，總之聽見人人讚好之聲不絕，最過癮就係聽到米高講佢嘅團體馬妙感在星期四晚跑夜馬有機會，左丁山心領神會，次晚就學孫柏文買一注獨贏，一注夾中妙感獨贏，真盞鬼！
I
没有评论:
发表评论