沒有了任美貞 - 左丁山
一位老友來電詢問：「喂，唔好講老任嘞，一朝天子一朝臣，現在老任復出，梗係要有所作為啦，你地班花生友評論員、經濟學教授、經濟研究員唔同意佢嘅觀點，有乜所謂啫，最緊要係林鄭特首第一時間鼓掌稱妙，話與老任有異曲同工之妙吖嘛。我要問你，南華早報嗰位任小姐Shirley Yam去咗邊呀，我鍾意睇佢專欄嘅，依家唔見有，佢係唔係放大假呀？」
哦，任小姐專欄失蹤，點知道有無內幕呀，左丁山只係記得，大酒店股價不斷上升之時，港交所披露一位投資者蔡華波，據稱係新加坡人，三十歲出頭，大手買入大酒店股票喎。馬場人士當然知道有一位闊綽馬主以高價買入一匹英國自購馬「赤兔寶駒」，初時放在何良馬房，後來在上季季尾就轉投方嘉柏馬房，目前係第二班馬。蔡華波咁有錢，背景如何，好多人都唔知，任美貞就在南早專欄指蔡先生與習近平親信千金嘅香港住宅地址相同，頗能引發讀者想像力。
該篇文章一出，有反應，南早好快在網上版刪除，跟住就唔見再有任美貞專欄出現咯。左丁山亦係佢嘅粉絲，喜其文筆辛辣，篤國企民企要害，往往一針見血，不過今次寫到習近平親信，唉，你懂的，南華早報大老闆姓馬名雲，容乜易暈暈哋呀！
冇任小姐踢爆一啲古靈精怪國企民企及內地大爺嘅搵錢方法，讀者當然有損失。呢日與一位核數師吃午飯，問佢上市公司有冇造假，佢幾乎啃唔落一粒蝦餃。定一定神之後，佢話：「現時政府罰銀行、罰會計師，絕不容情，我地核數嘅公司如果被發現造假數，而又有我地簽署財務報表，咁就好大鑊。我地在內地核數，有時要派人扮神秘顧客去暗地查算Sales是否屬實。又有一次扮顧客去某間內地銀行查客戶戶口，得銀行經理接見，點知經理係做媒嘅，卡片亦係假冒嘅，死未！好彩後來及早發現啫！」咁刺激，唔怪得新進會計師在核數方面做到咳。公司造假數，今日中國當然有，東南亞國家亦有不少。左丁山做銀行及投資公司之時，負責星馬泰印菲台客戶群，一間泰國公司財務總監直情承認為咗稅務理由，盤數有三款，靠睇所謂核數報告去評估貸款或投資，真係得啖笑；最過癮係一啲菲律賓公司，甚麼報表一應俱全，看似無懈可擊，左丁山搵唔到破綻，索性問位CFO：「你讀哈佛MIB學到啲乜嘢？」佢又答得妙：「我地盤數咁好，證明我讀哈佛冇浪費時間啦。」
Z88
没有评论:
发表评论