油價難升 - 左丁山
昨日講起幸好香港打大風不停電；想起前星期與世姪H在文華Cafe Causette飲下午茶。世姪H本在華爾街大行工作，親身經歷911人在世界貿易中心事件大難不死，索性辭工，自闖新天地，近年與志同道合朋友開設私募基金，但唔係多方面投資，而係專門集中在oil and gas，即是原油與天然氣有關連嘅能源項目，地區就以北美南美為主。
世姪H呢次回港，其實係有新加坡一行，新加坡之油氣工業比香港大好多，大家都知道嘅，點知佢去到新加坡第二日，就在烏節路PK，腳骨有少許破裂，今次飲茶，就見到佢要用左右兩枝腋下枴杖，幾慘情，但更慘嘅係佢下一個行程係回美之後陪外家到黃石公園有野外之旅，依家行動不便，真真掃興之至。呢排知道校友律師A去歐洲旅行，在梵蒂岡樓梯仆親，傷及腳骨，要入當地醫院，之前左丁山嘅舊同事在大雨之日，在寫字樓入口踩到濕地氈滑到仆在地上，肩骨破裂，起碼養傷六個月，睇見都驚，行路落樓梯確係不可不慎也。
問世姪H，如今環保潮流係用電力車，歐洲多國幾年後開始禁用柴油車甚至汽油車，富豪（Volvo）（已由吉利汽車買下）宣佈咗2019年全面停產汽油車，主力集中生產電力車，咁樣，投資油氣項目，會否吃眼前虧？世姪H話：「我公司漸漸減少投資油氣，但並非認為呢行唔掂，而係認為美國頁岩氣Shale Gas嘅生產成本因科技進步而大幅度下滑，投資油氣嘅回報率一定持續下降。可以講，原油價格好難超越60美元一桶，只會在50美元一桶徘徊，沙地阿拉伯曾經想用石油跌價嚟擊潰美國頁岩氣，但沙地原油成本雖然低至每桶10美元，但沙地公共開支龐大，老早使慣，正是由奢入儉難，沙地都唔想油價太低嘅，但升上去呢？又恐怕美國頁岩氣大量生產，現時生產成本價在50美元一桶左右，預料會跌到40美元一桶，沙地已經打唔出減價殺敵呢張牌，任何公司如在高價對沖油價，例如國泰航空，必定蝕底到暈。我公司有見及此，已走咗去南美投資可以生產鋰電池嘅礦產，電力車無鋰電池不行也。」
個個話電力車環保，無排放，符合巴黎協定，有無其他睇法呢？世姪H說：「全世界用電力車，只會益晒電力發電公司，將來幾億車要充電嘅話，電從何來？中電港燈呢類公司咪咪嘴笑嘅啫。電力車用鋰電池，但鋰電池絕不環保，將來大量報廢鋰電池如何處理係一個大問題，用汽油車就無此問題！」世事往往多矛盾，並無完美解決方案，且待下一代人想辦法。
Z88
没有评论:
发表评论