娛頭
老公放水 十月剖腹產子 黎姿資產大轉移
2012年09月27日今年十月，對大肚黎姿（ Gigi）別具意義，除了是四十一歲生辰，也是她的第二胎， BB出世大日子，一直想為老公追個仔的 Gigi，今次得償所願佗到慈姑椗，可以封肚收工。
距離生仔唔夠一個月時間，但肚大如籮，體重升至百六磅谷行奶的 Gigi，這段時間依然堅持帶孖女返學同出街玩，還挺住個肚返公司打理美容院生意，難怪老公馬廷強再加碼注資，支持老婆擴展業務。成功追仔
十月底，黎姿將會入院剖腹生第二胎，雖然老公馬廷強講到明，生仔生女都無所謂，家有孖女家蔚、家鎂已經好滿足，但 Gigi深明老公祖籍潮州，傳統家庭觀念重視男丁，就算去到四十歲，都堅持繼續生，誓為馬家添個慈姑椗。
「 Gigi好神秘，唔肯透露生仔定生女，每次問親佢係咪仔？佢都笑得好開心，又講到明生埋呢胎收工唔再生，見佢咁講，我哋成班 friend都估佢佗仔。」 Gigi友人說。
早兩個星期（九月十五日），大肚 Gigi同老公帶埋孖女到中環文華酒店 Cafe Causette食晏，由於當日天氣相當熱， Gigi穿上低胸碎花吊帶裙，再用圍巾護頸，肚大如籮的她，腰圍比例拍得住當年佗孖胎，有過佗 B經驗，著住平底涼鞋的 Gigi行動尚算敏捷。巨肚出巡加上臨盆在即，本身擁有導彈身材的愛美神，在這段谷奶時期，上圍顯得特別偉大。
21/9
手持新 HermesKelly，身穿白色短裙的黎姿到中環太子大廈同朋友傾生意，雖然大肚，但雙腳依然修長，沒有水腫情況。
離開時，馬廷強先行到酒店外等車，待車到後，他先叫老婆上車，免得熱親大肚婆。
黎姿間中都有將孖女的背部相放上微博，月前首次帶女去沙灘玩，她都有上載分享。
二歲大的孖女，由工人接送到酒店，會合爸爸媽媽一齊 High Tea。
之前有朋友特別訂製了兩張枱給孖女， Gigi表示要朋友送多一張，免得將出世的仔仔小氣。
Gigi一見寶貝女就顯得十分開心，立即拖住細孖。
五億慰妻
三年抱三，黎姿將為馬家添男丁，老公送遊艇送樓慰妻，禮物票面已超過五億，黎姿肚皮好值錢。
佗得舒服
在酒店大堂會合孖女後， Gigi拖住細孖家鎂行入餐廳，大孖就由工人抱住，十五分鐘後，馬廷強放工趕到餐廳會合三母女，一家人食了個半小時，孖女由工人照顧先行離開返屋企， Gigi同老公則留低，同其他人傾公事。
一傾又個幾鐘，一行人離開餐廳行去酒店大堂，由於車未到，馬廷強擔心老婆佗 B怕熱，自己行出門口等車，讓 Gigi繼續留在室內涼冷氣，非常體貼。
據知， Gigi今胎佗得好輕鬆，除了頭三個月出現作嘔易暈等大肚婆徵兆，之後身體已好快適應。由於上次細孖出世唔足磅， Gigi今次更加重視 BB營養，由懷孕開始，每日根據營養師餐單進食，加埋老公安排補品， BB媽咪營養十足， Gigi肚圍達五十吋，體重升至一百六十磅。
雖然 BB就快出世，但 Gigi仍堅持親自湊女返學，每日早上七點鐘起身，陪老公及孖女食早餐，十點陪兩個囡囡返學，湊完放學食埋晏，才會返美容院打理生意。
「其實 Patrick（馬廷強）唔想老婆咁辛苦，想佢做少啲，不過間公司始終係佢細佬（黎嬰）嘅心血， Gigi點都唔會放棄，加上佢一直相信細佬會好番，到時佢就可以親手將間公司交番俾細佬打理。」 Gigi身邊人說。
月前 Gigi的辦公室已搬到老公位於灣仔的新鴻基中心內，兩公婆經常一齊收工返屋企。
05年黎姿打本給細佬黎嬰開診所，全家人一齊剪綵。（《忽然 1周》圖片）
屬於 Gigi美容院的兩間公司 Cox Max及 G Max Group，在 8月期間同時將所有股份轉去一間海外註冊公司。
7月 Gigi母親陳婉辭去公司董事一職。
起死回生
全心全意為屋企人的黎姿， 05年打本給胞弟黎嬰，在銅鑼灣金朝陽中心開設的 cosmax激光美容中心， 07年黎嬰車禍重傷，腦細胞受損導致行動說話不便，昔日美容中心客仔紛紛踩上診所要求退錢，大量熟客流失，導致陣腳大亂，一度要裁員幫公司止血。
到 08年，黎姿宣布退出娛樂圈，結婚生仔同時，亦以老闆娘身份日日返細佬診所主持大局。除聘請多名外援皮膚醫生駐診，她更親力親為打理行政，睇住盤數，再做埋代言人招攬生意，一年之後終穩定軍心，每月營業額達 300萬，即使遇上金融海嘯， Gigi亦咬緊牙關度過。近年進一步推出自家品牌美容產品系列，更將原先只有千呎的診所，擴充到七千多呎，備有十六間治療室、超過二十多種國際級水準醫學設備，經常邀請外地名醫到港作交流，提供課程教護膚，稍後將會在國內開分店。
黎姿將細佬的美容中心搞得有聲有色，診所由千幾呎擴充到七千呎，裝修華麗高檔，希望吸納多些闊太客。
診所舉行員工講座，黎姿與醫護人員坐埋一齊聽，員工大讚老闆娘親民無架子。
公注資
為了全力支持老婆心願，又方便照顧大肚婆，馬廷強特別在自己位於灣仔新鴻基中心的寫字樓內，開闢一個地方給 Gigi做辦公室，又大幅加碼再注資入美容院，助她開拓大陸及海外業務。
「做生意一定係 Patrick強項，佢幫 Gigi換咗班勁人幫手打理，而家公司開始重組，會成立唔同部門，逐步擴展業務，除咗香港，仲會喺大陸同其他海外地方發展，甚至推出自家品牌護膚品。」一名美容院職員說。
Gigi的美容院 Cos Max於今年七月起開始進行大變動，原本是股東的黎母陳婉，七月九日正式辭去董事一職， Gigi於八月將 Cos Max Limited全數五百萬股，以及 G Max Group Ltd全數股份，轉去一間 BVI海外註冊公司 Sunny Bright Group Holdings Limited。
生意愈搞愈大， Gigi大住個肚，都要返公司睇住盤生意。
診所內仍掛住黎嬰的醫生名牌。
黎姿改名為黎珈而後迅速懷孕，今年終於成功追到仔。
Gigi仍等待細佬康復，可以重新接手生意。
十月底， Gigi將會到嘉諾撒醫院，入住每晚收過萬豪華產房生仔，並由生仔聖手何永超接生。
豪華產房有客飯廳及獨立 BB房。（《忽然 1周》圖片）
（《忽然 1周》圖片）
豪門慈姑椗
入得豪門，為家族繼後香燈責無旁貸，好運如李嘉欣可以一索得男當然安樂，但城中唔少富豪太太、女友，為添男丁，不惜生完再生。
徐子淇
（《蘋果日報》圖片）
先後為李家誠誕下兩女，至去年第三度懷孕，終於成功追仔。有指徐子淇根據「清宮生男生女圖」，計算行房時間，配合改變飲食習慣，多吃含鹼量高食物，如鹼性礦泉水及寶礦力，終成功佗「慈姑椗」。
王儷橋
原名王富信的王儷橋， 93年下嫁李澤鉅後專心為李家開枝散葉，可惜肚皮唔爭氣，分別在 96、 00及 03年誕下三名女兒，至 05年，獲高人指點改名王儷橋後，翌年才成功誕下男丁。
（《蘋果日報》圖片）
08年已為大劉誕下女兒劉秀樺的甘比，一直深得大劉歡心，今年初，甘比證實成功懷有男丁，與已有一子一女的大劉女友呂麗君打成平手。
没有评论:
发表评论