蘋果日報- 一張巴黎合照引發羅生門 柏豪被兩女鬧作大

一張巴黎合照引發羅生門　柏豪被兩女鬧作大

愛用文字和攝影抒發情懷的「大文豪」周柏豪，今年7月在巴黎街頭巧遇兩女生，事後公關把三人合照發放給媒體，內文提到她們狂冧大文豪，熱情蹺着他合照。誰料兩女在fb留言「唔係我哋主動要求合照」，又謂冇冧過柏豪，揶揄有人造新聞，一張合照引爆羅生門。

周柏豪早前獲法國品牌Chevignon邀請到巴黎參觀時裝展覽，他因利乘便到處觀光。曾迷倒賭王三房女兒何超雲的柏豪出巡巴黎街頭，竟然也遇上華人女粉絲。本周日IPS公關公司向傳媒發放柏豪此行宣傳照，當中有他被兩人如三文治夾實的合照，還提到女子見柏豪如螞蟻摟蜜糖。不過，相中女子蘇嘉慧日前在facebook鬧爆有人造新聞，堅決否認冧柏豪，好一樁羅生門。

【今日我至煩】

估唔到一張咁普通嘅合照都搞到咁多是非咁煩，唔知佢哋會唔會見過鬼怕黑，以後唔敢隨便合照呢？

「冇覺得你吸引」
當日公關發稿提到穿上橫間tee的柏豪，在巴黎街頭被穿橫直間恤衫的女子認出，女子興奮大讚：「穿間條衫的男孩很吸引呢！」跟着該女子熱情蹺着柏豪臂彎要求合照，工作人員即取笑柏豪，令他一臉尷尬，但仍答允跟該女生和其朋友合照。


柏豪與女粉絲合照見報後，當中名叫蘇嘉慧的在fb揶揄柏豪作大，她說：「都唔係我哋主動要求合照，造新聞能力真高，仲話OB（Obey）興奮上前讚偶像。」Obey也留言：「我從來冇覺得你（指周柏豪）吸引囉，見到你冇興奮過囉，更加冇蹺過你囉，掂都冇掂過你，幅相仲要唔係我同So（蘇嘉慧）要求影㗎囉，阿周柏豪，我係咁冧你upload上facebook timeline做profile picture、wallpaper，print埋佢出嚟派啦，激死我喇！」兩女唱雙簧否認冧柏豪。

跟柏豪合照完後的蘇嘉慧，當日在微博讚柏豪靚仔，又擺了三人的合照。

女子微博讚靚仔
為解開這單羅生門疑團，柏豪經理人Cindy昨在電話說：「張相我現場負責影，當時嗰兩個女仔行過嚟叫柏豪合照，難得喺巴黎見到中國人，大家咁熱情，柏豪咪大方合照。」IPS公關公司員工Cathy昨也說：「當時真係嗰兩個女仔要求同柏豪影相，佢哋影完仲興奮到馬上用手機貼上微博，佢哋仲關注埋柏豪㖭。」


記者昨日查看蘇嘉慧的微博，果然發現她在7月1日貼了跟柏豪的合照，還留言：「巴黎街上巧遇周柏豪，同靚仔影相好大壓力。」她又關注了柏豪的微博，見報後忽然數臭他，令人費解。


採訪：丁寧

合照曝光後，蘇嘉慧在fb留言指「唔係我哋主動要求合照」，揶揄柏豪造新聞。