最速快門復活
今期 Close-up同大家分析升呢 Full Frame相機嘅原因，而近期講到即將推出嘅 FF相機，一定唔可以唔提 Nikon會喺下星期公布嘅新機。
傳聞呢部 FF相機會叫做 D4H，外形同 Nikon 01年先停產嘅 FM2近似，即係走復古路線，採用光學/電子混合觀景器、 3吋 LCD芒。拍片方面，暫時有兩種傳聞，一種話部機拍唔到片，另一種就話只係接近冇電先拍唔到。預計連 50mm F1.8套裝約賣$26,000。雖然未知傳聞係咪屬實，不過揀 FM2又的確幾合 Nikon fans心水，事關呢部機 81年推出嗰陣除咗價錢親民易用之外，仲有就係快門速度高達 1/4000秒，當時可以話係世界第一嚟㗎。
機械人腳仔軟
七隻 Atlas有六隻喺美國，港大買嘅呢隻係唯一一隻喺美國境外嘅……殈！唔好俾特區政府知道，唔係又嚟影相攞威㗎喇！
由美國國防部研發、全球只得七隻嘅先進機械人 Atlas，今年七月有一隻運咗嚟港大工程學院，港大專登用 1500萬買入，就係想俾學生有機會接觸最尖端科技。十月中港大搞咗個記者會，諗住示範用 Atlas做到啲乜，開頭叫機械人耍太極仲好哋哋，點知示範跨過地下障礙物就出事，撞爛咗右腳眼零件。負責呢項研究、來自美國 Case Western Reserve大學嘅 Wyatt Newman教授話，原來 Atlas早前已「整親」左腳眼，估計係機械人行嘅時候，隻手舉得太高失咗平衡，而家 send晒數據俾美國製造商嗰邊，等佢哋分析完再睇吓有冇需要派人嚟維修。嘩！派專人過嚟，食住機票條數咪好襟計？ Dr. Newman話原來 1500萬已經包咗維修費，所有費用喺嗰度扣，不過佢哋都驚咁搞法好易扣到零，開始四出搵校友捐款。搞科研，錢從來都唔慳得。
一吋短一吋好
新 Kinect最高唔可以擺高過 1.8米，最低亦唔可以低過 0.6米，呢啲都唔係問題，最緊要係預留 1.4米就 OK吖嘛。
微軟部 Xbox One將會喺 11月 22日推出，現階段好似好弱勢，例如價錢貴過 PS4、跟機又一定要跟埋新版 Kinect。不過，如果單論體感操控，又的確係 Kinect好玩好多。有玩過 Kinect嘅話，可能都會知道最大弱點係唔多適合香港，因為香港樓太細，唔容易喺客廳預留兩米空間玩，咁買咗部機返嚟，咪盞嘥咗個 Kinect？唔使驚，上個禮拜網上流傳出一張 Xbox One設定手冊文件，上面標明新 Kinect只需要 1.4米距離就夠，慳番嗰 0.6米，真係夠擺張窄身梳化㗎！消息已經得到微軟證實，咁香港嘅 Xbox One準買家就真係值得開香檳慶祝喇！
没有评论:
发表评论