http://hkm.appledaily.com/detail.php?guid=19233529&category_guid=15307&category=daily&issue=20150727
名人食誌：陳志雲的蝦球胡椒粉絲煲
今時今日，喺呢個網絡鬧人唔使本嘅時代，如果有人話「我細個鍾意扭計食魚翅」，好可能被人喺網上圍攻，飽經風浪嘅商台首席智囊陳志雲卻無有怕，有嗰句講嗰講，反正兒時扭計食魚翅不是罪，而且佢有佢扭，陳爸、陳媽只會粉絲當魚翅，就令佢乖乖聽話。
粉絲煲對陳志雲而言，係充滿童年回憶嘅一道菜。喺眾多中菜館嘅粉絲煲當中，陳志雲又偏愛九龍香格里拉酒店香宮嘅出品。
事關佢兒時家住尖沙嘴，陳父不時喺黃昏時分帶住年幼嘅佢漫遊尖東海旁，所以佢對尖東有一份特別嘅感情，每次去到香宮食飯，佢都會要求廚師幫佢特別炮製一道蝦球胡椒粉絲煲（320元）。
陳志雲只喜歡炒得乾身嘅粉絲，而呢道粉絲煲確係平凡中見不平凡，夾一啖粉絲入口，一陣香濃嘅胡椒味喺口中徘徊，良久不散，胡椒味香而不辣，亦不嗆喉攻鼻；粉絲炒得乾身，口感分明，食得出廚師嘅功力。
都說飲食並非果腹咁簡單，除咗品嚐靚食材，好多時包含一段回憶，一份懷念，令人懷念嘅，通常係最簡單嘅餸菜。
記者：高淑嫻
没有评论:
发表评论