2016年7月21日星期四

【書展開鑼】特區抽濕機撐梁特連任　真心定假意？

書展昨日開鑼，場內似乎會特別乾爽，點解呢？因為有「特區抽濕機」、才子陶傑現場同我哋傾計。

近排好興向中國人道歉，陶傑話自己都要向中國網民道歉，因為用緊美帝生產嘅iPhone6，主持人問要唔要換小米，陶傑就話「冇搞喇」，寧願啲資料上icloud俾美帝監控。

佢又勸大家以後每逢聽到「中國一點都不能少」或者「真主偉大」呢兩term都要快啲走，唔係就好危險啊。

才子建議中國14億愛國嘅同胞們召募個「愛國反漢奸勤務兵團」，入影視店掃走哂美帝生產嘅荷里活電影，仲要謝絕Nike、Harry potter啲外國貨，着番「新巴倫」國產貨。另外留學美國嘅中國學生都應該返中國加入海軍，唔好考TOEFL。而香港人就好可惜，要喺一國兩制之下繼續「奉旨做漢奸」。

對於德國有難民斬傷香港人，陶傑就話當初德國女總理收容110萬難民，入面冇可能冇恐怖分子，話大愛包容包出禍，仲搞到香港人受害，提醒大家「通識應該建基於常識」。

講到特首選舉，陶傑就話兩個姓曾嘅應該「拍住上」，而其他林鄭、葉劉等人應該學識「3家誅死一家」，響應親中派呼籲「團結就是力量」。不過才子話自己好黑心，唔介意CY做多4年，因為當年有班人話「寧要狼唔要豬」，希望呢班人受多4年懲罰咁話。