風水與樓價 - 左丁山
二十四年前，地產經紀遊說左丁山換樓，賣掉第一城千呎單位，搬上火炭山頂，穗禾苑對上山頭。當時有三個半新樓盤，景觀最好，遙望沙田馬場，十分開揚嘅係碧霞花園，睇完樓就想開票，但回心一諗，呢個係王德輝興建嘅住宅大廈，要落停車場睇睇。一睇就見到停車場天花露出鋼筋，地面有積水，於是打退堂鼓。
跟住代理帶去睇沙田渣甸山獨立屋，以當年價格，千六呎單位，頂硬上都供得起嘅，不過要再睇埋華翠園先。咦，以圖則及間隔而論，非常合意，不過同埋去睇樓嘅有家中長輩，佢好唔高興露台望正寶福山嘅「寶塔」，認為風水唔好，大力反對，於是三個單位都看而不買，代理大失所望。
好嘞，到咗1994年駿景園賣樓花，新地嘅老友捉左丁山去睇示範單位，又幾好喎，剛啱有一位師兄對風水甚有研究，佢話：「基本風水理論係無根之樓，即係駿景園下面係空洞嘅，火車不停在樓下移動，主「不聚財」，「有交易，無積蓄。」聽完佢講又三心兩意咯，後來卒之在1997之前賣去沙田第一城單位，改為租屋住，97金融風暴於己無損。
眨吓眼過咗咁多年，望番轉頭，為之啞然失笑。唔買碧霞花園係啱嘅，因為已證明碧霞樓價跑輸大市，升得慢。因風水理論，當年唔買華翠園、沙田渣甸山及駿景園，就係老襯咗，白白損失賺樓價機會。幾年前見到一位風水師傅，佢在電台做完節目之後同左丁山講起呢個問題，佢話：「以往確實係咁睇嘅，但我講風水多年，發覺用風水睇樓價，喺香港多數預測錯誤，再三思量，發覺香港地少人多，用番左兄熟悉嘅經濟理論解釋，香港人對住宅有鋼性需求，兇宅都會有人搶購，何況只係開窗見到寶福山？九龍市區夠多隱藏性骨灰龕啦，市區樓價咪又係咁升！講到住宅下有火車走來走去不聚財，喺香港係過時理論，因為最緊要係交通方便，有地鐵先至有人氣，每個地鐵站上蓋嘅樓盤都升值快過人，駿景園可能係升得最慢嘅一個屋苑。」呢位師傅可能已經睇化咗，與時並進。香港跑馬地墳場之一公里範圍內豪宅甚多，有邊間大廈住宅唔一路升值升到飛起㗎。香港市區樓價係在董伯伯時代跌得慘啫，2004年開始反彈至今，主要原因，除咗低息之外，係「粒粒皆辛苦」吖嘛，需求大供應追唔上，邊有人得閒理會風水。
上一則: 八年前的預言 - 陶傑
下一則: 記平生口福
I
没有评论:
发表评论