佳餚美酒 - 左丁山
有讀者來電郵，指出香港航空「基本餐飲不用加錢買。」左丁山只講自己經驗，坐HX670去鹿兒島，坐前排（第31行）要加錢，多200元一程，要食餐也要加錢。朋友夫婦今星期坐香港航空去東京，機票幾便宜，但朋友張機票係「不包餐費」，至於其他人坐香港航空，「基本餐飲不用加錢買」，可能係人人遭遇不同啩。
又有讀者問及城山酒店吃鐵板燒嘅餐廳。我地第一晚吃火鍋，係在「水簾」，第二晚吃鐵板燒，餐廳入口相同，不過行左邊就係食火鍋，行右邊就係入去食鐵板燒，間餐廳就係叫做「楠」，食鐵板燒最好坐在廚師面前睇住佢燒，先至食得過癮。呢間鐵板燒「楠」確係幾正，未去之前，不妨先去士丹利街11號，試吓「山下」（Sanka）嘅鹿兒島黑毛和牛西冷燒，喺中環食鐵板燒，呢間可能係最正。
講到美食，最近在中環海濱舉行嘅美酒佳餚巡禮就真係吸引嘅，上星期四至日共吸引十五萬人次入內，非常成功，其中不少係外來遊客，可以講得話好評如潮。來香港，有乜景點，人所共知，其中一項最受外國遊客歡迎嘅，就係美食。今年旅發局拍咗四條宣傳短片（各30秒）在海外播放，最先推出嘅就係以美食主打，由居港意大利名廚Umberto Bombana（米芝蓮三星餐廳8 1/2主廚）做主打，介紹香港美食，短片中還見到香港飲食icon蔡瀾，龍景軒主廚陳恩德、添好運麥桂培等等，在士丹利街大排檔食本土菜式，睇見都想去食埋一份。另外短片有時尚設計、家庭旅遊及香江自然美景（CNN與Yahoo Finance網站有另外特別介紹）。
美酒佳餚巡禮由前旅發局主席田北俊年代開始，現任主席林建岳與田北俊同是紅酒專家，林建岳更投資開辦不少中日西餐廳，對美食好內行。佢推廣香港美食不遺餘力，為咗宣傳呢個美酒佳餚巡禮，上星期四開幕前請各大傳媒代表試菜，菜式中西合璧，由文華酒店、唐閣、怡東軒名廚炮製，再特別配以不同白酒紅酒。一講到白酒紅酒，咪超晒旅發局請客預算？冇有怕，林主席私人提供私伙白酒，紅酒就由唐英年推介，不入旅發局公數，岳少可謂做公職出錢出力，佢做夠6年退任後都唔知道去邊處搵人接替佢！香港固然不乏公職王，但做旅發局主席，要有真性情，真心投入，使埋自己錢而又樂此不疲，唔係有咁多人㗎咋。
上一則: 人世三大謎團 - 陶傑
下一則: 中國波普查建英 - 李家真
Z88
没有评论:
发表评论