2017年2月14日星期二

蘋果日報- 總之係要贏 - 左丁山

蘋果日報- 總之係要贏 - 左丁山

總之係要贏 - 左丁山

新年過後,上陸羽飲茶兼派利是,記者小G見到「十四金釵」走出廚房嚟排隊攞利是,細細聲講:「乜呢度咁多阿嬸同侍應嘅,我地到街坊酒樓飲茶,往往係自助式,冇乜夥計招呼嘅咋。」咁又難講,好多酒樓根本連洗碗清潔女工都請唔到,但陸羽女工根本好少離職嘅,個個年資甚長,其中理由,不言而喻,老茶客就會明白!

派完利是,與在座五位港大校友拜年,佢地畢業年份由1966至1983都有,有名醫、律師、退休賓架等。左丁山特登向佢地恭喜:「百年名校,盛產治港人才,對港貢獻巨大,其中不乏愛國愛港精忠分子,今年算命先生話女性當選,新特首一定係女人,當然一定係港大畢業生啦,此乃港大之光也,以茶代酒,向港大校友恭喜恭喜,以後五年港人治港靠晒港大人!」

以上所言,當然含有開玩笑性質,但五位港大校友聽咗,唧都唔笑,名醫拉長塊面話:「欽點啫,有乜稀罕,大凡得到中南海欽點之人,by definition,一定係Yes woman或Yes man,冇乜獨立思考,唔識明德格物!」港大學生係血氣方剛,先至咁反CY及唔喜歡CY 2.0啫,乜班老鬼校友都唔支持呢位好打得嘅女人!退休賓架M仲話捐咗錢俾MIT校友㖭,老嘅嫩嘅都唔like自己校友,唔怪得now電視與南華早報委託嶺大與中大做嘅民意調查,薯片叔叔都領先奶媽14個百分點。

以外國嘅民調而論,競選大凡有三四個競選人,其中一人領先其他人10個百分點甚至更多嘅情況下,領先者一定當選,只有領先三至五個百分點嘅情況,在統計誤差範圍內,才有反盤或民意調查失準嘅可能。但香港情況特殊,民望不等於選票,選委會大部份選委係冇獨立思考之應聲蟲,只會聽最高指示行事,未睇到政綱就一致綑綁提名奶媽,真正視民意如浮雲,當香港市民意見冇到,故此薯片一直捱打,有可能望「閘」興嘆,閘前撞上road block,馬失前蹄。港大校友律師W話:「如果薯片入唔到閘,會有民怨,以後香港人更加犬儒(cynical),其實咁樣對奶媽亦唔好,大勝都唔馨香。好似踢足球咁,一隊有足總領導人幕後幫手,球證識做,在球場上吹黑哨,罰對方主要球星出場,仲要俾埋一兩個十二碼罰球,啲觀眾睇到眼火爆,必然噓聲四起,廣東粗口出齊啦!」做律師就往往衰在講程序公平,人地係要講Winning is everything,最緊要達到目標,不用理會手段,贏就係贏,何須講求明德!

上一則: 火人與你 - 陶傑

下一則: 感謝梁振英禍港五年的,請舉手 - 林夕



I

没有评论:

发表评论