遊香港必食必玩推介 - 馮睎乾
早前台灣旅遊網站選香港Top 20食店，每況愈下的添好運位列榜首，可以當鬼掩眼睇唔到，但連翠華、檀島都雞犬升天，真係笑到有腹肌，靠，咁對名落孫山的大家樂、麥當勞公平咩？孟子曰：「口之於味，有同耆也。」真是屁話，潮流興撕裂，人各有舌，還是古代鬼佬說得對：De gustibus non est disputandum，即係話，口味嘅嘢，你識條鐵咩？但正如眾矢之的梁振英能團結香港，有間上過《華爾街日報》的傳奇食店亦可一統江湖，那就是以「港日Fusion料理」震驚宇宙的明將。絕對不是曲線，明將是香港人公認的終極大Boss，所謂「平生不食紅豆艦，食盡壽屍也枉然」，連日本遊客也不遠千里去朝聖，台灣朋友豈可錯過？
隨着特區淪陷，明將跟香港許多傳奇一樣，亦難逃消失的厄運，現在剩下兩間，一在沙田，一在屯門，我強烈推薦遊客去屯門，因為有深夜壓軸節目。是咁的：你先在明將「打大佬」，像葉劉一樣戰至最後一兵一卒，直到晚上十一點半，然後乘搭足以令咸美頓、羅斯堡羞愧的「亡命飛Van」，由屯門出旺角，那就能同時體驗香港兩大景點的震撼：一邊感受飛Van的飄移，一邊嘔出明將的壽司。搭過午夜飛Van的人都很清楚：世界上根本就冇拓海，或者人人都係拓海，老竇老母阿哥細佬條仔條女，只要有架小巴，人人都可以係拓海。想一睹神級車手風采的遊客，也不要錯過晚上十點後往來中環赤柱，將半山當秋名山的巴士。一架死死重重的雙層巴，像《少林足球》六師弟的輕功水上飄，居然在曲折陡峭的淺水灣山路上風馳電掣，逢彎片彎無須收油，將沿路下垂的樹枝統統撞飛。容許我大膽總結一句：沒吃明將、沒坐屯門飛Van和「秋名山巴士」，你根本沒來過香港。
I
没有评论:
发表评论