电子邮件关注

2017年6月3日星期六

【文化籽】《巴黎影舞者》 靚到想睇200次 | 2017-06-03 | | 蘋果日報

【文化籽】《巴黎影舞者》 靚到想睇200次 | 2017-06-03 | | 蘋果日報

【文化籽】《巴黎影舞者》 靚到想睇200次

【文化籽:果籽影評】
好矛盾,舞蹈應該流動,但當《巴黎影舞者》女主角用生命在跳舞,如花似蝶,我好想定格每一瞬,睇真燈光下每個律動,看清舞衣如何飄揚空中。我好肯定無論第十八秒,定係第三十四秒,總之每一秒都定必係一張曠世的絕妙圖片。我好想睇電影中的舞蹈正常速度一百次,再加慢鏡二百次。靚到犯規,妙到毫巔,我葡萄十九世紀末,可以親眼欣賞現代舞先驅Loïe Fuller演出的人,你哋對美嘅嗰條curve必定因而拉高咗好多。


舞蹈家Loïe Fuller為其舞蹈申請到服裝、燈光、舞台設備等十多個專利,在一個世紀前走得超前。

《巴黎影舞者》係呢位女神的傳記片。傳記難拍,一生傳奇要點樣串連,太考功夫,真係好難一take pass。廣告導演Stephanie Di Giusto越級挑戰,有丁點絆倒嘅感覺,視覺效果係一百分嘅,之不過古仔講得稍亂,節奏時鬆時緊,枝節太多,略顯冗長,令人好想動手左修右剪。如非有幾段令人生出起身拍掌歡呼慾望的舞蹈振奮一下,老實講有啲場口太瑣碎,係頗悶嘅。之但係佢個人經歷的確非常引人入勝,幫套戲先天攞咗唔少分。
一個世紀前有人竟然諗到要結合燈光效果及飄逸舞衣編舞,前衞得太緊要,𠵱家睇都真心拜服。手持長棍,在層層叠叠的布料下,計好晒角度揮動雙臂,就幻化成彩蝴蝶與鏡中花,表演用肢體寫詩。歌手SOKO演活拼死綻放,用撕心痛苦練成絕美的Loïe Fuller,你望住佢不停忍痛敷冰,見到佢因為強光爛眼,半條人命chur到透支能量,長時間對住會一齊隱隱作痛,好得人驚。每支舞都呈現佢不同的情緒,真係好吸引。
電影為佢創作咗兩段情,跟伯爵的唔上唔落,唔知想點,不過Gaspard Ulliel係eye candy類,我膚淺我接受。後段特別加插佢同後來居上的「現代舞之母」Isadora Duncan的女同性戀情節,冇乜鋪墊突然愛到瘋狂的情節唔多合理。角色由Johnny Depp個女Lily-Rose Depp飾演,即使有點過份擠眉弄眼,但因為靚到天使咁,佢做乜都可以原諒。在大宅內嗰場舞令我can't take my eyes off her,令人驚艷,不得了。結尾呼應Loïe Fuller前段不欲曝光於人前,怕大家對她再沒幻想,我覺得幾有心思。見自己,見天地,見眾生,大概就係咁。


Gaspard Ulliel飾演愛慕Loïe Fuller的頹廢伯爵,有少少花瓶。


片中有女主角帶領舞者在森林中即興起舞的情節,突破傳統編舞形式。


Lily-Rose Depp演繹充滿野心的舞蹈天才Isadora Duncan。

《巴黎影舞者》(The Dancer)
導演:Stephanie Di Giusto
演員:SOKO、Lily-Rose Depp、Gaspard Ulliel
現已上映 75分

記者:葉青霞
編輯:馮秀珍
美術:孔文彬

2017果籽繼續認真知味。識買惜用。行以求知。好事多為。重修舊好。
緊貼果籽報道,即like: http://fb.me/AS.AppleDaily



I

没有评论:

发表评论