內地人搵銀實際 - 左丁山
左丁山老友博士C以前做銀行工時，駐過北京做代表幾年，對北京非常熟悉，素來都注意中共、中國嘅人事變動情況。香港不少五十五歲以下才俊，即使身居高位，但文革時期還未夠十七、十八歲，對中國打倒四人幫之前嘅國情好多矇查查，只知道鄧小平掌權，力推改革開放後嘅事情，對中國認識係唔夠全面嘅。一位五十歲嘅親中商業集團高層，就同左丁山講過：「我追看人民的名義。一路睇一路學習國情，戲裏面有好多嘢係我唔明白嘅，甚麼正部級、正廳級體制我都要學。」
博士C睇「人民的名義」直情可以做埋解讀導師，好似張曉明主任咁，習近平走咗之後（離開香港），就周圍演講寫文章，教人如何「精讀」、「體會」習近平訪港活動期間發表的重要講話的體會，為香港人補習補習，你估我地唔識睇中國大陸之現代漢語文章咩，最妙嘅就係還有寫稿匠長篇大論咁講述張主任精讀之精要，教我地睇張主任體會習近平演說之體會！
叉開咗咯，講番博士C最近上北京回港之後，在飯局發表談話，指原本有希望接班之重慶市委書記孫政才突然被免職，令接班計劃出現變數，上海韓正及廣東胡春華於是更有希望，中共十九大會議後可能會更上一層樓。王岐山主持中紀委，果然係鬼見愁，過往五年，不少極高層人物紛紛墮馬，黨政高官人人自危，但十九大之後，王岐山論年齡，依鄧小平訂下嘅傳統習慣，理應夠鐘下台嘅噃，究竟王岐山落唔落呢？博士C話內地人熱烈追看（翻牆吖嘛）郭文貴嘅YouTube談話，郭文貴不停講王岐山，似有挑撥離間習王兩位一體嘅關係，引起不少迴響，即使官媒拼命抹黑郭文貴都冇用。坦白講我地香港人上YouTube睇郭文貴，一來未必聽得懂佢嘅普通話，二來對佢所講之人與事，亦不熟悉，所以冇乜人追看，朋友之中，只有博士C例外，佢晚晚睇得津津有味，指郭文貴所言，即使不完全真實，亦充份反映內地人之做事作風，啱香港商人參考。內地人會唔會因此懷疑中央呢？博士C話：「你同我定，中國知識分子一百年來未有過咁好景嘅經濟生活，人人掛住享受當下，忘記過去，只要中國共產黨能維持經濟增長，中產大量浮現，冇人會願意批評中共，追求民主嘅，劉曉波只係例外之例外，在不少中國知識分子心中，劉曉波不識時勢，不值得同情！」現在講賺錢搵銀年代，誰做皇帝，與中國人民無干！
Z88
没有评论:
发表评论