蘋機會：那些年， Replay濕身的日子
2012年03月30日
- 全城都話對《那些年》有共鳴，只因戲內充斥大家仔時嘅頑皮、媾女回憶；麻甩仔圍埋唔敢睇鹹片，只不斷 Replay某些電影性感片段，大家便已樂上半天。今日將六千萬票房奇蹟帶返屋企，慢慢找回心中的沈佳宜。死命盯着女神濕身情節，拿出紙巾準備好好宣洩一下，別想歪，紙巾是用來抹掉感動之淚的。
記者：韓繼聰男心動：佳宜濕身
1.陳妍希做沈佳宜之前星路平平，《那些年》之後即刻升格做女神。
《那些年》之所以咁熱爆，大概都係因為「共鳴」兩個字，正值青春年華當然不在話下，連老餅如我，都因為睇到戲中一幕幕浪漫純真情節，而泛起記憶漣漪，感動莫名。作者兼導演九把刀係台灣小說家，作品以量多題材廣見稱，《那些年》其實就係佢嘅自傳小說，早於 2007年出版，已經俘虜咗唔少讀者嘅心，到電影推出就更一發不可收拾！
要講呢齣戲，聲畫當然唔係討論重點，劇情先最緊要。感動位首推柯騰同沈佳宜喺格鬥大會鬧大交，同埋結局一幕，我身邊一班 Friends都喊到變豬頭！另外，憑演出榮升女神嘅「沈佳宜」陳妍希，喺戲裏更兩度濕身演出，一次係畢業旅行沙灘玩水，一次就係雨中鬧交，今次出碟，宅男們大可無限 Replay，慢慢欣賞女神出水芙蓉的美態。電影完結後咪急住熄機，幕後花絮有女神被劇組整蠱，慘被「毀容」，過程極度爆笑！
2.結局一幕超感動，唔好話女生，就連我呢個大男人都睇到暗暗落淚。
3.女神兩度玩濕身，一喜一悲，宅男們應該起碼 Replay一次。
4.柯震東飾演的柯景騰其實就係作者九把刀自己，不過，靚仔好多。
5.「人生本來就有很多事是徒勞無功的啊。」放心，唔係個天唔鍾意你。
6.柯騰替沈佳宜受罰，幼稚之餘，卻不失有型，沈佳宜自此更留意柯騰。
7.睇完呢幕，我好期待今年暑假都有女神陪我暢泳。
女必叫：柯騰逐件脫
Bonus同樣精采，今次《那些年》 DVD同藍光碟同樣收錄長達 110分鐘幕後花絮；除監製、導演、演員訪談同幕後拍攝花絮，仲有未曝光片段。嫌普通？非也非也！事關其中一幕係柯騰邊行邊脫，脫到得番條底褲，型到不堪，女 Fans必定尖叫！另外 DVD更有一款鐵盒珍藏版，內附 32頁的電影寫真集、 8張導演加演員親筆感言明信片、以及電影菲林底片。寫真集自然係 Fans必愛，明信片亦可見導演及演員的心思，寫的動人，畫的更是有趣，值得收藏。而送電影菲林底片雖然唔係新鮮事，由於隨機附送，抽中邊格就要睇彩數，網上更有唔少台灣網友 Post出自己抽中嘅菲林，有人豪晒自己抽中主角浪漫一幕，亦有人抽中肥仔「阿和」的菲林而大呼無癮。不過相比台灣，香港 Fans就未算熱情，雖然 DVD同 Blu-ray銷量都好，深水埗嘅特別珍藏版已出現斷貨，有心買就要落旺角搵吓喇。
■花絮再出現柯騰除褲打手槍，又係女生尖叫位。
■睇到碟尾，女神慘遭「毀容」，超爆笑。
■柯騰邊行邊脫，女 Fans必睇！
■廖該邊情挑彎彎，好搞笑。
《那些年，我們一起追的女孩》
■ DVD鐵盒珍藏版內容豐富，有寫真集、明信片、以及電影菲林底片。
没有评论:
发表评论