潮𡃁便當
沾麵大鬥法
拉麵狂熱不斷之際，在日本，沾麵呢種用筷子夾住麵條蘸汁的食法，已經流行 10多年，喺 2009年開始仲年年有全國大規模比賽，呢股風潮，最近悄悄在港啟動，新店、新 menu愈來愈多，仲愈玩愈激，在沾汁、麵條方面各出奇謀，有理由相信，沾麵，將會成為新
常勝軒川嶋先生
富士山 55佐藤先生
周月高島先生
爆彈屋平野先生
辣到 4am 麻香沾麵
銅記潮人行到夜，最想都係食番餐。來自廣島的爆彈屋，聽個名就知勁，星期一至六仲開到凌晨 4點，啱晒夜媽媽想食辣宵夜朋友。店內沾麵辣程度分 1-200級， 1-2級人人食到， 10度辣味香味參半， 20度開始，辣味愈食愈出，嘴唇麻麻哋，好過癮，去到 50度，已經辣到噴火！辣汁原來卻是特地為好辣的港人而設，日本 70度，相等於香港 100度，辣汁用上指天辣、麻油、唐辛子辣椒粉整成，湯底則加入豬骨、免治肉碎、赤味噌等熬成，所以即使食到 50度，食落都仲有芝麻及醋香，酸酸哋，辣得爆開胃！提提大家，辣汁同麵有冷熱之分，唔怕爆炸者，建議食熱麵點熱汁，香辣度 X 2！
廣島沾麵(冷/中)$78
除了辣汁，芝麻亦是重點，一夾麵條，芝麻掛滿嘴，咬落粒粒爆開好甘香。
辛味噌沾麵(熱/中)$85
辣汁入口酸酸哋，配以芝麻香，意外地好易入口，但亦好易食多咗，出事！
CHECK！辣爆排行榜
店內有一個木製排行榜，記錄不同客人往績，商台 DJ Donald 1月中亦曾在此挑戰自己挑戰人。
任添芝麻
店內每張枱，都有一大碗芝麻免費任加，由日本送來後經店鋪打至 3成碎，麻香更突出。
辣汁
食到一半想中途加辣？冇問題，每加一小殼，相等於加辣 10度，不收分文。
食客 Mioz學生
我第 1次嚟，好鍾意食辣嘢，準備挑戰 20度辣，呢度好多人嚟！
廣島沾麵本鋪爆彈屋
地址：銅鑼灣駱克道 453號地下
電話： 2891 1530
營業時間：星期一至六： 12nn-3pm， 6pm-4am；星期日： 12nn-3pm， 6pm-1am
彈牙 4層薯粉麵
周月出名莫過於由店師傅每日親製的麵條，沾麵更特別用上 2種麵粉 mix成，使麵身較硬。過程會將麵條反覆弄成 4層，令層次更豐富，同時加入薯粉，令麵的質地不致太黏身，十分講究。沾汁則選用四國有 140年歷史的梶田商店出品的醬油，以無添加方法造醬油，讓醬油自然發酵 18個月，更加香濃。梶田商店一向不對外出售醬油，不過碰巧與周月老闆相熟，才特意為老友記親製醬汁。麵勁好咬口，在齒間略為黏實後立即分離，不偏不倚，配以香濃香蔥沾汁，絕配！如果食個陣，見到一層油光泛面，千祈咪意外，個啲係加入魚粉的的凡立貝油，鮮香味 ichiban！
沾麵$85
沾汁香味特濃，略帶魚香及油香，麵身入口具嚼勁，一試難忘，更甚者連小小香筍，都爽口有筍味！
野菜味噌沾麵$88
入口微微帶辣，唔會太鹹，配以大量椰菜，爽口健康。
CHECK！製麵 4部曲
Step 1
將麵粉加水，形成粒狀，推到製麵機器內，壓成麵條。
Step 2
將壓好條粉捲成 2疊，再壓出，並重複以上步驟，令麵條壓至 4層。
Step 3
在麵條上慢慢加入薯粉，令麵身不會過分黏連。
Step 4
將麵條切割器放在機器內，麵條出來時，用手向上壓令麵條造至曲身，方便掛汁。
食客 Sammi& Joey咖啡調配師
我哋點咗野菜味噌沾麵，辣辣哋但又唔膩，仲有好多椰菜，健康啲。
麵鮮醬油房周月
地址：中環歌賦街 5號地下
電話： 2850 6009
營業時間：星期一至五： 11:30am-8:30pm，星期六、日： 12nn-6pm
名古屋特濃日日賣日賣 200碗
濃香櫻蝦沾麵$88
湯身每口都帶櫻蝦鮮味，掛在有嚼勁的直麵上食，甘香四溢，加熱後，鮮蝦味落晒湯底，仲驚喜！
香港呢間富士山 55，乃名古屋總店在美國 LA、法國、泰國等地開分店後再一間海外分店。秉承總店風格，富士山 55將豚骨沾麵湯底造得特別香濃，點麵吃最啱，齋飲則會太膩，若想飲湯者可叫店員加魚介湯，中和口味。湯底每天晚上落場後開始熬製，起碼熬製 10小時，由於店鋪面積不大，但又堅持每日熬湯，所以最多日弄 200碗，不過店主 Gary卻說，沾麵不論平日週末，長賣長有，賣完仲會提早關門，想食要快！
CHECK！貼心電爐暖麵
溫度直接影響味道，為了保持湯身熱辣，店內每張枱旁邊都自設電爐，湯汁凍咗都冇有怕！
食客 Yoshi& Ryan學生
我哋嚟咗 3次，叫咗特濃豬骨沾麵，貪佢嘅湯底可以加飯同芝士一齊食，一舉兩得。
富士山 55
地址：尖沙咀麼地道 75號南洋中心地下 7-8號
電話： 2723 7737
營業時間： 12nn-11pm
沾麵始祖徒弟正宗店
特製沾麵$93
麵條啖啖彈牙，配合香濃湯底，汁香掛在麵條之上，間或有蔥粒、香筍鹹香調味，味道更豐富。
要了解日本沾麵發展史，不得不提山岸一雄，因為呢款以麵點汁食法乃由他發明，並由他在東京池袋開設的大勝軒傳開。幾個月前，佐敦恆豐中心內的 Ramen champion開了一間常勝軒，店師傅川嶋直之，正正師承山岸一雄，所以店內的沾麵，造法正宗，湯底以豬骨、雞骨、鰹魚、乾魚等材料整成，豬大腿骨落得特別多，湯底香濃，而麵條直身，煙韌彈牙，叉燒肥美，入口滿口肥膏香，各方面都做得出色。提提大家，常勝軒之外，仲有 5間拉麵店拍住上，大把選擇！
Ramen champion內還有 5間日式拉麵店，造成 food court形式，其中東京忍者（店名）的師傅，打扮到忍者一般，勁 cosplay！
CHECK！食得有步驟
一到 Ramen champion，店員會向每個客人派 order card，有不同 number。
選擇好食乜同店鋪後，店員會向客人派一個屬於個別店鋪的機仔。
客人在座位等候，麵準備好時機仔會發出響聲及紅光，提示有麵拎。
用餐過後才付款，有別一般 food court先畀錢後食嘢。
食客 Ronnie鐘表業
嚟呢度好開心，因為一次過有 6間麵店選擇，水準都唔錯！
常勝軒
地址：佐敦恒豐中心地庫 Ramen Champion 6號鋪
電話： 2377 9944
營業時間： 11:30am-10:30pm
攝影：葉曉明
没有评论:
发表评论