人民大會堂菜式 | 蘋果日報 | 副刊 | 名采 | 20070516

 

人民大會堂菜式

左丁山有份一個午飯會輪到地產Ｃ做東，落力點菜，不過最正一樣就係佢帶兩支紅酒，飲落零舍唔同。退休賓架Ｌ以前在法資銀行工作，講法文甚流俐，又曾在南越西貢（現稱胡志明市）工作，對法國菜與紅酒最有研究。佢一飲地產Ｃ私藏，立即讚好，拎酒樽睇，係波爾多一九九六年產品，係乜牌子，左丁山唔識法文，睇完唔記得。經賓架Ｌ品題，人人爭飲，兩支靚酒好快清晒。地產Ｃ飲得十分開心，畀侍應貼士係紅底一張，原來係人民幣。地產Ｃ話：「埋單後就去機場搭飛機去北京，荷包已經袋滿人民幣。」女侍應收到人民幣一百元做貼士，笑到出聲，人民幣仲好過港幣啦。

地產Ｃ乃係食家，上到北京梗會食好。左丁山好大鄉里咁話，「試釣魚台，人民大會堂的國宴級數好喎。」都未講完，前輩Ｂ已經出聲：「，釣魚台唔掂，我慕名而去，好失望而回，而且又貴到死。」中貿Ｎ跟住講：「人民大會堂菜式都係唔掂。講真，香港一級菜可以橫掃全國，人民大會堂，釣魚台邊處係皮。」佢經驗豐富到極，唔輪到左丁山出聲。不過三星期前沙田馬會凱旋廳食過人民大會堂廚師炮製「仿國宴」，好正，尤其是一味「酸辣龍筋湯」（龍筋即重二百公斤鱘魚筋），十分罕見，好味到連食家薛都大讚特讚；另一款「美味豆腐」，將雞胸肉磨成粉狀，與豆腐混合，加上蟹黃，現在講番都流口水，因為前所未見也。呢一餐份量甚重，食到豆腐，已經捧住肚，尤其是一開始就食 包，個肚更飽。據解釋，到人民大會堂飲宴外賓，鍾意食 包先喎。於是呢，諗起好多年前去湛江，領導人請吃晚餐，白灼蝦靚到不得了，但冇飯食，只有牛角包，據講湛江曾為法國租界，法國人留下一式絕招，就係做牛角包，鬆化美味，香港未試過咁好食。賓架Ｌ話越南仲有法國遺風，一法國餐整得好過巴黎三星廚師。此言一出，群情洶湧，話要搵時間去越南見識。

左丁山

人民大會堂菜式 | 蘋果日報 | 副刊 | 名采 | 20070516