保護存款
失驚無神，股市大跌，主因係一個微不足道嘅國家塞浦路斯受歐盟所逼，向全國銀行存款徵收存款稅所致。存款在銀行，好多國家會向存戶徵收利息稅。香港在1950至1960年代，就有利息稅，於是大量離岸美元流往新加坡，造就新加坡成為亞洲美元中心，與香港爭奪金融中心地位。後來夏鼎基發覺利息稅對政府收入嘅貢獻甚少，於是廢除之，香港先至挽回競爭力，與新加坡互爭雄長至今，情況就如唐英年廢除遺產稅，曾俊華廢除葡萄酒稅，呢三次「廢除」，對香港經濟增長起了歷史性作用。
利息稅嘅影響尚且大到咁，何況直接向存款徵稅，邊會有人甘心繳付㗎？特別係一生積蓄嘅小存戶、小市民㖭。歐盟與塞浦路斯政府起初以為存款稅相等於富人稅，懲罰俄羅斯大戶、大鱷，一刀劈落去，不了解到受創最大嘅係小存戶，啲政府政策話事人簡直係蠢蛋，好難想像佢地係自歐美精英名牌大學畢業，政治經驗豐富嘅人物。
金融M本來見慣風浪，以為有乜嘢我未見過？今次都俾塞浦路斯嚇咗一驚，感嘆「精英」害人，殃及全世界股市，可能引起世界性回響──不信任銀行體系。猶記得1983年港元實施聯繫滙率之前，港元大跌，香港人慌忙搶購糧食廁紙，曹仁超屋企人就是如此。金融M有感而發，對左丁山講：「從電視見到塞浦路斯人擠提ATM機，你有乜感覺？」左丁山其實亦問過幾位朋友有乜感覺，綜合嘅答案係：（一）從銀行提款三數萬元放在家中或寫字樓夾萬，以防萬一；（二）買番個金幣傍身（按：近日金價受塞浦路斯局勢刺激而上升）；（三）在其他地區嘅銀行開存款戶口，分散存款風險；（四）在銀行開設戶口前，先查閱其資產負債表及銀行所在國家/地區之公債與GDP比率，避開高槓桿國家。金融M聽了為之失笑：「你估所有存戶都識得country risk analysis嘅咩，攞嚟講！」普通存戶確係唔識嘅，越戰結束後，越南充公南越人民在外資銀行嘅存款，有越南船民逃出後，向法庭申訴，結果花旗銀行只係發還佢地存於新加坡花旗嘅存款，存於西貢（今胡志明市）花旗之存款，就化為烏有！（按：當年在西貢開戶口，可選擇戶口之所在地，不少東南亞人民來香港開設ACU（Asian Currency Unit，即亞洲美元）戶口，存款於新加坡。）
没有评论:
发表评论