Facebook（fb）以190億美元收購WhatsApp（以下簡稱App），豪氣驚人，呢次驚天大收購，雖未打破2001年惠普收購康柏電腦之250億美元及2000年AOL以1820億美元（連債項）收購時代華納嘅紀錄，但已經係科網股狂潮爆破後嘅新高。不可不提的是，惠普與AOL嘅收購，都冇好結果，AOL更加損失慘重，歷史經驗顯示，每逢有近乎瘋狂嘅併購出現，泡沫離爆破之期不遠了。
fb以190億美元收購App是否瘋狂？收購條件係，120億元以fb股票支付，40億美元現金，另加30億美元的「有限制股份」（restricted shares），分四年支付俾App嘅創辦人與現時僱員（55名）。呢30億美元係用來綁住佢地唔好在四年內離開公司嘅。以一間小公司（55人）計，190億美元嘅市值相等於一間Gap Inc（時裝公司，有僱員136,000人），唔怪得有人話做流行時裝不值錢。
190億美元點樣計算出嚟，彭博通訊有如下推論：App有4.5億用戶，每日增加一百萬人，一年可增加3.65億人，兩年之內（假設增長不變），用戶會有11.8億人，當作10億人計，以每人付費用99美仙為基礎，一年嘅收入係十億美元，收購價錢等於營業額嘅19倍，至於P/E市盈率，當然高到上天。咁高嘅Price to Sales比率，據彭博翻查紀錄，只有聲稱開發「神奇新藥，救命靈丹」嘅藥廠試過有，現在fb是否當App係救命靈丹？
以現時用戶數目計，fb或者會覺得抵，fb上市價係38美元，上市後最低跌到大約17美元多啲，現時作價68至69美元，已從低位反彈四倍，P/E高到112倍，印公紙仔（股票）收購App，正合時宜。另外，fb有12億個用戶，自己市值約係1730億美元，每個用戶值144美元，而App有4.5億用戶，作價190億美元，每用戶只係值42美元，好低啫！但與另一類似公司Viber相比，日本樂天剛以9億美元買入，每個用戶只值3美元，從以上數據睇，App嘅市值雖然高到離譜，但fb股票何嘗不然，兼且實際現金支出只係40億啫，其他用高價fb股票交換，29歲嘅薩加堡識計數嘅。
没有评论:
发表评论