讀書搵食啫 - 左丁山
與朋友N傾咗香港金融中心地位一大輪，行出星巴克門口，先至醒起冇問到佢對新加坡嘅意見，於是在街上再講多幾分鐘。朋友N話：「我駐新加坡有三年咁耐，新加坡並非政府宣傳得咁清潔乾淨，香港有好多街道比新加坡還要清潔，佢地嘅MRT比我地MTR差幾皮，細節唔多講，新加坡作為21世紀金融中心，因離開中國遠一啲，做中國生意冇法子比香港更方便，呢一瓣佢輸晒，唯一希望係印度崛起，東盟十國興旺而且又全部利用新加坡為融資、上市中心，先至可以同香港一爭。但如果中銀香港接管晒中國銀行（3988）嘅東南亞分行業務後，加大力度發展，配合中國銳意發展一路（東南亞），會有可能搶走新加坡嘅生意，但中銀又可能因應政治需要，將生意在新加坡入賬。」
講得有啲道理，朋友N看來見多識廣，成個地球人咁款，新一代銀行金融界高層，應該係此類人，不過聽講佢間公司遇上管理情況問題，此乃公司政治糾紛，係對領導才能嘅大考驗，成功人士不能迴避呢種大挑戰。
香港時至今日，仍以金融中心地位最穩固，無東南亞或上海亦難以挑戰。但全球新經濟注重科技公司，開口埋口就係互聯網絡、生物科技、生命醫學、電動汽車。偏偏呢三樣嘢都係香港所缺失，好似眼光光做全球科技花生友咁，得個睇字，唔怪得有心人如徐立之周圍奔跑呼籲香港注重STEM教育（科學、科技、工程、數學），發展本土科技。因佢不時出入歷山大廈，左丁山在中環天橋碰過佢幾次，每次都係聽佢講STEM，親自去搵羅范椒芬、楊潤雄等有力人士去游說。一次，左丁山對佢講：「立之，香港中學生叻仔叻女都係要讀理科嘅，不過在你的一代，係會報讀生物，同學考三個A會報電機工程，現在呢？理科狀元級人馬就全部去讀商科或醫科，唔讀STEM，呢個先至係問題焦點呀！」徐立之惟有苦笑。前幾日遇到一位生命醫學公司亞太區總經理，佢嘆息話在香港請人好難，少見有biotech高級學位嘅應徵者，佢話香港的理科生去晒邊？左丁山笑住講：「多數在商學院！」總經理話：「我唔要BBA呀。」咁要啲乜？香港地方細，學生怕出路有限，唔願意修讀所謂「窄行頭」嘅科目，讀書為咗搵食啫，呢樣心態，深入民間，十年之內難以清除，或者一啲有心人要請新一代「香港人」如馬化騰、汪滔等，到各中學來一次巡迴演講，鼓勵中學生入讀大學以STEM為目標，不再是「環球商業」！嗱，再現實啲講句，讀完商科做ibanker，只能跟馬雲馬化騰啲夥計拉關係，成日做跟班㗎咋。
没有评论:
发表评论