潮玩Mainland Crush港人唔輸得
一款名為Candy Crush Saga嘅遊戲最近喺facebook大熱，無數網民日以繼夜、夜以繼日咁玩，出門用手機玩，返到屋企就用電腦玩，過關升呢緊要過食飯，甚至畀錢買時間。佢哋每過到一關就即刻分享炫耀，過唔到關就慘過生意失敗，要公開跪求過關秘訣。
簡單啲嚟講，Candy Crush Saga係串連方格上嘅糖果得分。喺現實生活中，呢幾年香港都玩緊呢個遊戲，crush嘅意思係擠壓，亦都可以解作一堆逼埋晒嘅人群，Saga就係長篇冒險故事咁解；不過香港玩緊嘅唔係Candy Crush，而係Mainland Crush。
玩家每年幾萬人計
Mainland Crush Saga嘅玩家嚟自內地，佢哋爭奪嘅唔係糖果，而係床位、奶粉同學位。呢班為數每年幾萬人嘅玩家，先殺到香港搶奪醫院產房床位，BB出世之後，就再嚟香港各大藥房掃奶粉，BB再長大一啲，就聯群結隊跨越深圳河爭學位，咁仲唔係一大堆人史詩式嘅長篇故事？
有內地人在網上炫耀向水客搶購到嘅大量奶粉。互聯網
花巨資買床位移民
遊戲同現實何其相似？買到奶粉嘅內地人會喺網上炫耀戰利品，而為咗過關來港產子升呢，呢班玩家會不惜花巨資買床位，甚至投資移民。
所以吳爽強烈推介各位父母鼓勵子女得閒玩吓Candy Crush，等佢哋自細習慣咗呢種殘酷嘅資源爭奪遊戲，否則大個仔就會執輸㗎喇。
吳爽
没有评论:
发表评论