【諧音乜乜乜】港九都有髮剪局 今次唔關劏房波事
俗語有話，唔怕生壞命，最怕改壞名。見到Samsung部Galaxy Note7，就知道應該唔係香港人改名。好多店舖起名都鍾意玩食字，簡單一間理髮店，食住個髮字，原來改名可以天馬行空，髮剪局、髮拉利、週潤髮、基本髮、高等髮院……地道得來又夠創意，足以令你會心一笑。唔知你又會唔會因為間髮廊個名得意，而專門去剪頭髮呢？
髮拉利 聽個名以為收好貴？其實洗剪都係$78。老闆娘梁太話法拉利個名威水又易記，8年前開舖就改名為髮拉利。 地址：大埔運頭街B1E地下
髮剪局 髮剪局共有3間，分別位於油塘、觀塘、筲箕灣，是連鎖店（不過英文名都唔同）。髮剪局其實早過真正的發展局出現，負責人（油塘）阿關話以前睇電視新聞經常聽到旅遊發展局、貿易發展局，覺得有趣，即興用來做舖名。噢，陳茂波局長，今次真係唔關你事了。 地址：油塘鯉魚門廣場1樓132舖頭
高等髮院 你冇睇錯，真係高等髮院，大概2004年開業。老闆鍾生話以前開過終審髮院及髮官，似乎好鍾意法律喔。 地址：將軍澳新都城商場一期2樓223-224舖
週潤髮 見到個名，大概都估到老闆娘陳小姐係發哥fans，但原來還有多一層意思，她希望每個來洗頭的人每周都能滋潤頭髮。週潤髮有20年歷史，之後也曾在香港仔開分店，可惜兩年前結業。 地址：鴨脷洲海怡半島海怡東商場G16號地舖
facebook有專頁叫瑞士髮廊，收錄有趣的髮廊名字。
記者：劉東佩
攝影：王國輝、周芝瑩
Z88
没有评论:
发表评论