跑馬三人競選 - 左丁山
香港政壇係陰謀論盛行嘅地方，胡國興法官宣佈參選後，不少人紛紛打探胡官背後有否財團與政要撐腰。一啲朋友以為左丁山消息靈通，猛咁打電話嚟問，哇，鬼知咩，試吓信任胡官以赤子之心，不滿一男子嘅政策與行事作風，興起挽救香港和諧發展之志，毅然出山競選，得唔得呀？
朋友話左丁山係儍仔，以胡官嘅資歷經驗，一定唔會貿然行事，一定係有政治後台喎。儍仔就儍仔啦，胡官有冇人在背後，胡官是否肯為別人服務做一台戲，目前只有佢知道，將來公眾是否知悉內情，就要等佢老老實實寫回憶錄或者電腦資料外洩，外人誰也說不清楚，而「疑點利益歸於被告」，目前只好相信胡官係獨自行動，無政黨支持，無中央祝福，無西環暗示，無財團示意。
知道有後台就反而容易對付，冇就不知如何看待胡官呢隻冷馬，因佢無後台可燒可拆也，對手都唔知佢搞邊科。梁特近日網上言論、公開談話，其微言大義好清楚，就係針對曾俊華，暗示手下財政司不可輕舉妄動、出嚟挑戰波士，波士永遠是對的，知道冇！至於胡官，梁特未有理會噃。
曾俊華到呢個時候，一係宣佈辭職，宣佈競選特首，一係忠心於梁特，宣佈心無二用，正全力為新財政年度預算案做緊工夫。兩樣都唔講，一時話等「天機」，一時話：To run or not to run, that is the question。猶猶豫豫咁，非大將風格也。要做大事，就不能婆婆媽媽啦，唔通佢心存顧忌，驚中央唔高興？若然，梁特嘅強硬作風似乎更合習核心口味，番書仔冇得揮嘅。
葉劉又係可能等緊聖旨，未敢輕舉妄動，林鄭就據報導周圍吹淡風為自己降溫，似乎無心戀戰噃，未知是否以退為進，故意示人以弱。於是2017特首戰最似有三至四人角逐，即梁特、鬍鬚曾、葉劉與胡官，梁特有在位優勢，應該秤先啲，但今次未必有689票咁多。假如曾葉兩人臨門縮窒，剩番梁胡決戰，梁特可贏幾個馬位。不過中午吃飯之時，分析R對左丁山講：「如果曾退出，葉劉一定會參選，或者叫埋林鄭參選，中央要買保險㗎。既然有胡官衝出嚟玩，不能讓佢單挑梁特，否則梁特在競選期間突然腳痛或心痛，唔通讓胡官自動當選咩，擺多個葉劉陪跑，中央就有第三者保險！」分析R係有道理噃，睇嚟2017特首競選，最少有三隻馬入閘。
上一則: 到底他是誰 - 陶傑
下一則: 管好你的情人孩子和電腦（下） - 曾志豪
I
没有评论:
发表评论