郭鶴年買糖 - 左丁山
俗語有云：各有前因莫羨人，有啲人得到某一國家特別照顧，唔好眼紅嘞，你點知人地以往對該國有乜大貢獻喎！
郭鶴年家族集團公司，無論係郭氏兄弟、嘉里、萬通，香格里拉或甚麼牌頭，在中國做生意，總不見有甚麼政府機構或地方官僚打壓，事情總係辦得幾順風，冇乜阻滯咁。點解北京對郭家如此好人呢？咪係有遠因嘅囉，遠則有郭鶴年二哥郭鶴齡老早加入馬共，入叢林與英軍打游擊，而馬共與中共有千絲萬縷關係，二哥郭鶴齡被英軍擊斃，算係馬共烈士，二來郭鶴年兄弟自創業以來，雖靠供應英軍大米糧食起家，但心懷祖國，憎恨英國殖民主義與種族歧視，富愛國情懷，不單止感情上親中共，做生意方面亦願意為中國犧牲個人及公司利益。
以前有愛國報紙講述周恩來密令中國糖食公司請郭鶴年在國際市場買糖。在1960年代，郭鶴年已有東南亞糖王稱號，中國信任佢。郭鶴年傳第九章有講述呢段故事：1970年初，中國文革到了中期，民不聊生，五豐行兩名高層濮金心與林中鳴（後來五豐行主席兼行政總裁）求見，郭鶴年自新加坡飛到香港與兩人在住所密會，知道中國急缺白糖，幾個月內全國無糖，急需自國際市場買糖，但當時又無外匯買入口貨，就係要郭鶴年想辦法幫忙。
郭鶴年保證郭氏兄弟集團不會從整個買賣過程圖利，首先整個集團在三個月之內暫停本身食糖業務，所有買入食糖，全屬五豐行。當晚就以佢自己私人戶口在倫敦及紐約買入期糖，以後每日逐單逐單買入，每次買單不太大，以免惹人注目，而且要通過不同經紀落單；同一時間郭鶴年派人去倫敦直接與壟斷巴西食糖出口的糖酒協會（Institute of Sugar & Alcohol）聯絡，協商直接向巴西買入現貨，然後到里約熱內盧直接交易。紙包不住火，期貨市場好快就傳出有神秘日本人在倫敦與巴西人商談，期糖價格開始上漲，於是郭鶴年下令不要再同巴西人講價，立即向巴西入貨，用香港萬通公司簽訂協議，萬通得0.5%佣金。協議宣佈後，糖價暴漲，郭鶴年立即平盤，沽出手上期貨合約，將利潤存入倫敦嘅中國銀行分行，交番俾五豐行一共250萬鎊利潤，30萬噸糖亦按中國定價交貨。有此原因，當郭氏集團與其他人在中國偶有商業利益爭執時，你話北京會幫邊個？
没有评论:
发表评论