金融市場沉醉於美國QE3之際，不少美國投資專家警告，酒醉過後（飲得太多QE），次早醒來，慎防已走近財政懸崖（financial cliff）（即到了十二月三十一日，美國共和民主兩黨如仍未能就預算案及延長小布殊減稅呢兩件大事達成協議，美國政府就會被法例強逼在明年一月加稅及削減公共開支），成個美國經濟會即時陷入衰退。另一位大型基金經理講過，伯南克推行QE3，只係為美國人打定防流感針，預備美國人自懸崖跳落大西洋登陸諾曼第！如果真的有財政懸崖，病人打咗乜針都死啦。
共和黨羅姆尼在全國民意調查落後奧巴馬四至六個百分點，在四十五個州唔係與奧巴馬打和就係落後，睇嚟形勢惡劣，加上呢位美國百中無一嘅尖子精英學生（哈佛JD加MBA雙學位），雖然在金融界有名氣，憑私募基金成為億萬富豪，好似好醒，但玩政治就唔係奧巴馬嗰皮，除咗講錯嘢之外，連私人稅務資料都俾奧巴馬陣營玩殘，去年交稅一千三百七十萬美元（實際稅率14.1%），私人投資交付俾一個自己不能管嘅全權信託（blind trust），內裏竟有中海油嘅股票，於是立即飽受奧巴馬及自由派評論員猛烈攻擊，現在距離大選只有個幾月，點樣收復失地呀？只有寄望於十月份開始嘅三場總統候選人辯論，但過去數十年總統候選人辯論選舉史顯示，無論誰勝誰負，對總統選舉結果並無影響，何況聰明到死嘅奧巴馬競選辦公室已經周圍放風，話羅姆尼讀書時辯論叻過人，係辯論冠軍，奧巴馬會輸辯論嘅嘞。呢啲期望管理牌，打得夠快啩！
奧巴馬政府要加稅時，通常在法案內加入「派糖」條款，如果共和黨人在眾議院否決，共和黨議員就要背負「拒絕優惠人民」之惡名，玩政治玩成咁，高手也。哈，估唔到梁班子上台後，玩政治的確醒過前朝政府，黃毓民揚言會透過立法會拉布推倒「特惠生果金」（2,200元）之資產審查，林鄭月娥就聲言會以立法會通過計劃（特惠生果金）的生效日期，定為發放津貼日期。換言之，若拉布阻延通過，特惠生果金亦會拖延派發，令泛民議員備受長者壓力。咦，開始照抄奧巴馬方法咯喎，香港議會政治在十月後開始有睇頭。
第 3/3 页
没有评论:
发表评论