蘋果日報- 隔牆有耳： 林鄭升官後縮水一圈 - 李八方

隔牆有耳：　林鄭升官後縮水一圈 - 李八方

林鄭月娥年初接受本報訪問時臉圓圓（左圖），氣色十分好；至上周出席馬季開鑼，明顯瘦咗一圈，臉頰都凹晒（右圖）。

有官場中人近日問八方，覺唔覺得林鄭自從做咗政務司之後，越來越打得之餘，仲越來越瘦，７月１日至今好似縮咗一個圈，令人擔心佢四處撲火，壓力大到影響身體就陰功喇。

特區管家想肥都難
老實講，林鄭身形一向瘦削，不過佢年初仲係臉圓圓，睇落氣色好好。八方搵返林鄭上任政務司前後啲相做對比，佢平時着套裝都唔為意，但一換上旗袍「骨感」就出晒嚟。

好似6月底梁振英新班子見傳媒，7月1日宣誓，八方都覺得佢比起年初時清瘦咗唔少，到近期佢出席馬季開鑼，件旗袍仲有啲鬆身，而且臉頰凹晒，下巴尖尖，難怪會引起政府中人猜測。

林鄭上任以來冇停過撲火，回應完頂頭上司狼振英僭建、愛將麥齊光又爆醜聞落台，家要湊住「劏房局長」陳茂波，又要代教育局局長吳克儉硬頂國民教育一仗，就連近日水貨客問題，都有傳由佢統籌一個跨部門小組處理。

搞到成個特區管家咁，壓力之大可想而知，真係想肥都難。